អន្តរជាតិ៖យន្ដហោះមួយគ្រឿងនៃក្រុមហ៊ុនអាកាសចរណ៍ Vietjet Air បានរត់ធ្លាក់ចេញពីផ្លូវយន្តហោះនៅអាកាសយានដ្ឋានអន្តរជាតិTan Son Nhat នៅទីក្រុងហូជីមិញ កាលពីរសៀលថ្ងៃអាទិត្យទី១៤មិថុនាឆ្នាំ២០២០ នៅពេលចុះចតចំពេលមានភ្លៀងធ្លាក់ខ្លាំង។
យន្តហោះជើងហោះហើរVJ322 នេះ បានហោះមកអាកាសយានដ្ឋាននេះពីកោះភូគួក(Phu Quoc) នៅឯនាយសមុទ្រភាគខាងត្បូងនៃប្រទេសនេះ។ នៅពេលវាបានចុះនៅអាកាសយានដ្ឋាន Tan Son Nhat វាបានរអិលធ្លាក់ចេញពីផ្លូវយន្តហោះចូលទៅវាលស្មៅមួយនៅក្បែរនោះ។កម្លាំងសន្តិសុខនៅអាកាសយានដ្ឋាននេះបានដោះស្រាយបញ្ហាគ្រោះថ្នាក់នេះហើយក្រុមអ្នកដំណើរត្រូវបាននាំចេញពីយន្តហោះនោះនិងដឹកទៅកន្លែងសុវត្ថិភាព។
ឧបទ្ទវហេតុនេះបានធ្វើឱ្យប៉ះពាល់ដល់ការធ្វើដំណើរនៃជើងហោះហើរជាច្រើនទៀត។មន្រី្តអាកាសយានដ្ឋាននេះ បាននិយាយថា ផ្លូវហោះហើរនៅអាកាសយានដ្ឋានេះត្រូវបានបិទរហូតដល់ម៉ោង៥ល្ងាច។យន្តហោះទាំងអស់ ទាំងចុះនិងហោះឡើងបានទទួលផលប៉ះពាល់។
ក្រុមហ៊ុនអាកាសចរណ៍ Vietjet Air បានបញ្ជាក់អំពីឧបទ្ទវហេតុនេះដោយនិយាយថាអ្នកដំណើរទាំងអស់មានសុវត្ថិភាពនិងត្រូវបាននាំចេញពីយន្តហោះនោះ។ហេតុការណ៍នេះបានកើតឡើងដោយសារអាកាសធាតុអាក្រក់ ដោយភ្លៀងធ្លាក់និងខ្យល់ខ្លាំងនៅពេលនោះ ៕
