ព្រះវិហារ៖ ក្នុងឱកាសប្រារព្ធទិវាអនាម័យបរិស្ថានជាតិកាលពីព្រឹកថ្ងៃទី២៣ខែវិច្ឆិកា ឆ្នាំ២០២០នេះលោកនេត្រភក្ត្រារដ្ឋលេខាធិការនិងជាអ្នកនាំក្រសួងបរិស្ថានបានបន្តលើកទឹកចិត្តអាជ្ញាធរមូលដ្ឋាន។ជាមួយនោះសុំឱ្យប្រជាពលរដ្ឋឱ្យបង្កើនការចូលរួមដាំដើមឈើនៅតាមទីសាធារណៈ,សាលារៀន,វត្តអារាម,នៅតាមក្រសួង,និងមន្ទីរអង្គភាពនានា។ដើម្បីបង្កើនភាពបៃតងចូលរួមការពារបរិស្ថាននិងធនធានធម្មជាតិនិងប្រព័ន្ធអេកូឡូស៊ីបង្កើនគុណភាពខ្យល់ថែរក្សាគុណភាពដីនិងការពារប្រភពទឹកក្រោមដីសម្រាប់មនុស្សជំនាន់ក្រោយទៀត។
លោកនេត្រភក្ត្រារដ្ឋលេខាធិការនេត្រភក្ត្រាបានថ្លែងថាៈព្រៃឈើដើរតួនាទីសំខាន់ក្នុងការការពារប្រព័ន្ធអេកូឡូស៊ីដែលយើងចាំបាច់ត្រូវដាំបន្ថែមពីលើឈើធម្មជាតិដែលកម្ពុជាមាន។លោកថ្លែងបន្តថាៈបច្ចុប្បន្ន គម្របព្រៃឈើកម្ពុជាមានជាង៨,៥លានហិកតាស្មើនឹង ៤៦,៨៦ភាគរយនៃផ្ទៃដីសរុប របស់កម្ពុជា។
ដោយឡែកផ្ទៃដីព្រៃឈើដែលស្ថិតក្រោមការការពារនិងអភិរក្សដោយក្រសួងបរិស្ថានមានទំហំប្រមាណ ៧,៣លានហិកតាដោយចែកចេញជា ៦៥តំបន់ការពារធម្មជាតិដែលរួមមានឧទ្យានជាតិ ដែនជម្រកសត្វព្រៃ តំបន់ការពារទេសភាព តំបន់ប្រើប្រាស់ច្រើនយ៉ាង រួមនឹងរបៀងអភិរក្សជីវៈចម្រុះ។
លោក ប្រាក់ សុវណ្ណ អភិបាលខេត្តព្រះវិហារ បានក្រើនរំលឹកក៏ដូចជាជំរុញឱ្យស្ថាប័នសាធារណៈ និងឯកជនអាជ្ញាធរគ្រប់លំដាប់ថ្នាក់ប្រជាពលរដ្ឋចូលរួមធ្វើអនាម័យនិងថែរក្សាបរិស្ថានជាប្រចាំនៅតាមមូលដ្ឋានរបស់ខ្លួន។លោកក៏បានជំរុញឱ្យអាជ្ញាធរមូលដ្ឋានជាមួយនឹងស្ថាប័នពាក់ព័ន្ធធ្វើការអប់រំផ្សព្វផ្សាយដល់ប្រជាពលរដ្ឋពីការគ្រប់គ្រង ទុកដាក់សំរាម និងសំណល់រឹងឱ្យបានត្រឹមត្រូវផងដែរ។
ជាមួយគ្នានេះដែរ លោក ជួប បារីស៍ អគ្គនាយកនៃអគ្គនាយកដ្ឋានចំណេះដឹង និងព័ត៌មានបរិស្ថាន បានថ្លែងអំណរគុណដល់ថ្នាក់ដឹកនាំ និងមន្ត្រីរាជការក្រសួងបរិស្ថាន ជាពិសេស អាជ្ញាធរ និងមន្ត្រីរាជការនៃខេត្តព្រះវិហារយុវជនសិស្សនិស្សិតនៅជុំវិញខេត្តដែលតែងតែគាំទ្រដល់គ្រប់ចលនាបរិស្ថាន។
លោកជួបបារីស៍ក៏បានផ្តល់នូវអនុសាសន៍មួយចំនួនក្នុងការថែរក្សាបរិស្ថានរួមមាន៖អនាម័យខ្លួនឯងជាប្រចាំ, ទុកដាក់សំរាមឱ្យត្រូវក្នុងធុង, ស្រឡាញ់ ការពារ និងដាំដើមឈើ៕សហការី
