ពោធិ៍សាត់ៈ បុរសពីរនាក់បានដាច់ជើងទាំងពីរ និងបែកក្បាលដោយសាររថភ្លើងកិននៅពេលដែលពួកគេទាំងពីរនាក់នាំគ្នាផឹកស៊ីស្រវឹង ហើយទៅដេកនៅលើផ្លូវដែក។ហេតុការណ៍នេះ បានកើតឡើង នៅលើកំណាត់ផ្លូវដែកត្រង់ចំណុចស្ទឹងដាច់ ស្ថិតនៅភូមិអូរចាន់ ឃុំស្វាយស ស្រុកក្រគរ ខេត្តពោធិ៍សាត់កាលពីយប់ ថ្ងៃទី១២ ខែតុលា ឆ្នាំ២០២០។
ប្រជាពលរដ្ឋដែលនៅកន្លែងកើតហេតុ បានឱ្យដឹងថាៈ ជនរងរបួសទី១. ឈ្មោះ ភុត ធា អាយុ ៣៣ឆ្នាំ រស់នៅភូមិអូរចាន់ ឃុំស្វាយស ស្រុកក្រគរ របួសបាក់ជើងទាំងពីរ និងបែកក្បាល។ ដោយឡែក បុរសម្នាក់ទៀត ឈ្មោះ រស់ រិទ្ធិ អាយុ ៣៥ឆ្នាំ រស់នៅភូមិរលួស ឃុំកំពង់ពោធិ៍ ស្រុកក្រគរ ខេត្តពោធិ៍សាត់ របួសបាក់ជើងទាំងពីរ ។
ប្រភពដដែល បានបន្តថាៈ ជនរងរបួសទាំង ពីរនាក់ បានត្រូវបញ្ជូនទៅសង្គ្រោះ នៅមន្ទីរពេទ្យបង្អែក ខេត្តពោធិ៍សាត់ ។ចំណែកក្បាលរថភ្លើង ពុំបានឈប់ទេ គឺបន្តដំណើរទៅបាត់៕សហការី
