ភ្នំពេញៈស្ត្រីម្នាក់សង្ស័យស្រវឹងស្រាបើករថយន្តស៊េរីទំនើបបុករះរថយន្តនិងម៉ូតូរបស់ភ្ញៀវចូលផឹកស៊ីចតនៅមុខហាងសាច់អាំងបណ្តាលឱ្យរងការខូចខាតយ៉ាងដំណំព្រមទាំងបង្កឱ្យបុរសម្នាក់ ជាសន្តិសុខយាមមុខហាងរងរបួសធ្ងន់។ហេតុការណ៍បានកើតឡើងនៅចំណុចមុខហាង យីហោពិភព សាច់អាំង៤ស្ថិតនៅបណ្ដោយផ្លូវលេខ៥៦៦ក្នុងសង្កាត់បឹងកក់ទី១ខណ្ឌទួលគោកកាលពីយប់ ថ្ងៃទី៩ ខែតុលា ឆ្នាំ២០២០ ។
សាក្សីបានឱ្យដឹងថាស្ត្រីម្នាក់ បើករថយន្តស៊េរីទំនើប ម៉ាកPEUGEOT ពណ៌ស ពាក់ស្លាកលេខភ្នំពេញ2BE9400ធ្វើដំណើរតាមបណ្ដោយផ្លូវលេខ៥៦៦ទិសដៅពីកើតទៅលិចក្នុងល្បឿនលឿនបានរេចង្កូតមកខាងស្ដាំដៃជ្រុលទៅបុករះរថយន្តចំនួនពីរគ្រឿងម៉ូតូពីរគ្រឿងនិងបណ្តាលឱ្យបុរសជាសន្តិសុខម្នាក់រងរបួសធ្ងន់។នារីជាម្ចាស់រថយន្តបង្កបានហៅម៉ូតូកង់បីដឹកជនរងគ្រោះជាសន្តិសុខបញ្ជូនទៅសង្គ្រោះ នៅឯមន្ទីរពេទ្យដោយខ្លួនឯង។
សមត្ថកិច្ចជំនាញមកធ្វើការវាស់វែងយករថយន្ត និងម៉ូតូទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាន នគរបាលរាជធានីភ្នំពេញ ចាត់ការតាមផ្លូវច្បាប់៕
