បាត់ដំបង: កាលពីយប់ថ្ងៃទី២ ខែតុលា ឆ្នាំ២០២០ ជនសង្ស័យម្នាក់ បានលួចយកម៉ូតូពីស្ត្រីម្នាក់នៅចំណុចមុខវត្តឈើទាល ស្ថិតក្នុងក្រុមទី៦ ភូមិ-ឃុំឈើទាល ស្រុកបាណន់។ជននោះបានជិះគេចខ្លួន ចូលមកក្រុងបាត់ដំបង ទាំងភ្លៀង ហើយបានរអិលម៉ូតូដួល ទៅទាក់នឹងរបងខ្សែលួសសាលារៀន បណ្តាលរយះបំពង់កសន្លប់បាត់ស្មារតី ។នៅចំណុចម្តុំរូបសំណាក នាងរំសាយសក់ ស្ថិតក្នុងភូមិសាលាបាឡាត់ សង្កាត់អូរម៉ាល់ ក្រុងបាត់ដំបងសមត្ថកិច្ច ដឹកយកទៅព្យាបាល នៅមន្ទីរពេទ្យ ដោយមានដាក់កម្លាំងយាមការពារ ។
មន្ត្រីនគរបាល ស្រុកបាណន់ បានឱ្យដឹងថាៈ ជនសង្ស័យ នៅមិនទាន់ស្គាល់អត្តសញ្ញាណទេ ព្រោះរបួសធ្ងន់ធ្ងរ។ ចំណែកម្ចាស់ម៉ូតូ មានឈ្មោះ សូរ វ៉ុងឌី ភេទស្រី អាយុ៥០ឆ្នាំ នៅភូមិ ឃុំខាងលើ មានមុខរបរ លក់ប្រហិត ។ ម៉ូតូដែលត្រូវចោរលួចយក ម៉ាកហុងដា ឌ្រីម ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ បាត់ដំបង 1W.1051 ។
ស្ត្រីរងគ្រោះ បានរៀបរាប់ប្រាប់ សមត្ថកិច្ចថាៈ ក្នុងពេលដែលកូនស្រី ឈ្មោះ វ៉ាន់ ស្រីម៉ុច អាយុ២៤ឆ្នាំ កំពុងលាងសម្ឋ្អាតទូលក់ប្រហិត ដោយទុកម៉ូតូក្បែរខ្លួន មិនបានដកសោ ត្រូវបានជនសង្ស័យ ឡើងជិះ ដោយមានការប្រវាយប្រតប់គ្នា បណ្តាលឲ្យជនរងគ្រោះ រងរបួសស្រាល ទាំងម្តាយ និងកូនស្រី ហើយជនសង្ស័យ ជិះគេចខ្លួន ឆ្ពោះមកក្រុងបាត់ដំបង៕សហការី
