កំពតៈ កម្លាំងនគរបាលខេត្តកំពត បានឃាត់ខ្លួនបុរស ជាជនបរទេស និងស្ត្រីខ្មែរ រួចកសាងសំណុំរឿង បញ្ជូនទៅតុលាការពាក់ព័ន្ធករណីគ្រឿងញៀនជាច្រើនកញ្ចប់។ដោយឡែកកម្លាំងនគរបាលនៃស្នងការដ្ឋានខេត្តកែបក៏បានបញ្ជូនជនសង្ស័យម្នាក់ទៅសាលាដំបូង ខេត្តកំពត ពាក់ព័ន្ធករណីដូចគ្នានោះដែរ។
មន្ត្រីសមត្ថកិច្ច បានប្រាប់ឱ្យដឹងថាៈ ជនសង្ស័យទាំងពីរនាក់ រួមមាន ១.ឈ្មោះ COUTELAS MARKROBERT ជាជនជាតិអូស្ត្រាលី អាយុ៧០ឆ្នាំ ស្នាក់នៅភូមិកំពង់បាយខាងត្បូងសង្កាត់កំពង់បាយ ក្រុងកំពត ខេត្តកំពត។ ២.ឈ្មោះ តុក ឆានី អាយុ៣៥ឆ្នាំ រស់នៅភូមិចិន្តាម្លូ ឃុំវាលចាស់ ស្រុកឧដុង្គ ខេត្តកំពង់ស្ពឺ។
ប្រភពដដែល បានរៀបរាប់ថាៈ ដោយទទួលព័ត៌មានច្បាស់ការណ៍ កាលពីរសៀល ថ្ងៃទី២៥ ខែកញ្ញា កម្លាំងនគរបាលនៃស្នងការដ្ឋាន ខេត្តកំពត បានចុះដល់ផ្ទះស្នាក់នៅ របស់ជនបរទេសនេះភ្លាមៗ។ បន្ទាប់ពីឆែកឆេរ រកឃើញគ្រឿងញៀន បួនកញ្ចប់ធំ មួយកញ្ចប់តូច និងកញ្ឆាក្រៀមមួយ កញ្ចប់ សមត្ថកិច្ច ក៏បានឃាត់ខ្លួន អ្នកទាំងពីរតែម្តង។
ស្រដៀងគ្នានោះដែរ នៅព្រឹកថ្ងៃទី២៦ ខែកញ្ញា នេះ កម្លាំងនគរបាលប្រឆាំងគ្រឿងញៀនខេត្តកែប បានបញ្ជូនជនសង្ស័យម្នាក់ ទៅតុលាការខេត្តកំពត ពាក់ព័ន្ធករណីចែកចាយ និងប្រើប្រាស់គ្រឿងញៀន ។
សមត្ថកិច្ច បានឱ្យដឹងថា ជនសង្ស័យ ឈ្មោះ ខនភ័ក្ត្រណាភេទប្រុសអាយុ១៨ឆ្នាំរស់នៅភូមិអំពេង ឃុំអង្កោលស្រុកដំណាក់ចង្អើរខេត្តកែប។
ជនម្នាក់នេះបានលាក់ទុកនូវម្សៅក្រាមពណ៌សថ្លាមួយកញ្ចប់ធំ និងមួយកញ្ចប់តូច។ សមត្ថកិច្ច បានឃាត់ខ្លួនជនសង្ស័យ កាលពីយប់ ថ្ងៃទី២៤ ខែកញ្ញា ឆ្នាំ២០២០ ត្រង់ចំណុចខាងកើតរង្វង់មូលរូបសំណាកសេះស ប្រហែល ៤០០ ម៉ែត្រ ស្ថិតក្នុងភូមិអូរក្រសារ សង្កាត់អូរក្រសារ ក្រុងកែប៕