សៀមរាប:រដ្ឋបាលខេត្តសៀមរាប ថ្លែងអំណរគុណសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា ដែលបានប្រកាសសម្រេចកញ្ចប់ថវិកា ចំនួន ១៥០លានដុល្លារអាមេរិកសម្រាប់ស្ថាបនាផ្លូវចំនួន៣៨ខ្សែក្នុងខេត្តសៀមរាបក្នុងកិច្ចប្រជុំពេញអង្គគណៈរដ្ឋមន្ត្រី នាថ្ងៃទី៤ ខែកញ្ញា ឆ្នាំ២០២០នេះ។
រដ្ឋបាលខេត្តសៀមរាប បានបញ្ជាក់ថា ក្នុងនាមក្រុមប្រឹក្សា គណៈអភិបាលខេត្ត មន្ត្រីរាជការ កងកម្លាំងប្រដាប់អាវុធគ្រប់លំដាប់ថ្នាក់និងប្រជាពលរដ្ឋទូទាំងខេត្តសៀមរាបសូមគោរពថ្លែងអំណរគុណយ៉ាងជ្រាលជ្រៅបំផុតចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានប្រកាសសម្រេចកញ្ចប់ថវិកា ចំនួន ១៥០លានដុល្លារ ក្នុងកិច្ចប្រជុំពេញអង្គគណៈរដ្ឋមន្ត្រី នាថ្ងៃសុក្រទី៤ ខែកញ្ញា ឆ្នាំ២០២០ សម្រាប់ស្ថាបនាផ្លូវ ចំនួន ៣៨ខ្សែ ក្នុងខេត្តសៀមរាប។
រដ្ឋបាលខេត្តសៀមរាប បានបញ្ជាក់ថា ហេដ្ឋារចនាសម្ព័ន្ធផ្លូវតូចធំដែលមានចំនួន ៣៨ ខ្សែ ដែលគ្រោងនឹងសាងសង់នៅក្នុងទីរួមខេត្តនេះនឹងជួយលើកស្ទួយដល់ជីវភាពរស់នៅរបស់ប្រជាពលរដ្ឋ ព្រមទាំងជួយជំរុញដល់កំណើនសេដ្ឋកិច្ចជាតិនៅក្រោយជំងឺកូវីដ១៩។ ជាមួយគ្នានេះ សម្តេចតេជោ នាយករដ្ឋមន្ត្រីនឹងផ្តល់កិត្តយសក្នុងពិធីបើកការដ្ឋានសាងសង់នេះ ហើយសង្ឃឹមថានៅចុងឆ្នាំ២០២១ យើងនឹងមានផ្លូវស្អាតក្នុងទឹកដីអង្គរអច្ឆរិយៈនេះ៕
