ស្ទឹងត្រែង៖កាលពីថ្ងៃទី៣ខែកញ្ញាឆ្នាំ២០២០បុរសម្នាក់គំរាមបញ្ចេញvideoរួមភេទជាមួយនារីម្នាក់ត្រូវបានចៅក្រមស៊ើបសួរនៃតុលាការខេត្តស្ទឹងត្រែងសម្រេចចោទប្រកាន់ពីបទគំរាមកំហែងកេរ្ត៍ដាក់ពន្ធនាគាររង់ចាំការស៊ើបអង្កេតជាបន្តទៀត។
សូមបញ្ជាក់ថាជនជាប់ចោទឈ្មោះចាន់ភ័ត្រាអាយុ២៤ឆ្នាំមានស្រុកកំណើតភូមិក្រោមឃុំព្រះរំកិលស្រុកថាឡាបរិវ៉ាត់។បច្ចុប្បន្នរស់នៅភូមិលើឃុំថាឡាស្រុកថាឡាបរិវ៉ាត់ត្រូវបានសមត្ថកិច្ចនគរបាលព្រហ្មទណ្ឌកំរិតស្រាលនៃស្នងការដ្ឋានខេត្តស្ទឹងត្រែងបានឃាត់ខ្លួនកាលពីថ្ងៃទី១ខែកញ្ញាឆ្នាំ២០២០។
ក្រោយពីជនជាប់ចោទនេះបានប្រើរូបភាពគំរាមទារប្រាក់ទៅលើនារីម្នាក់ដែលជាសង្សារដោយលួចលាក់អស់រយៈពេលជាច្រើនឆ្នាំបុរសនេះបានប្រើរូបភាពគំរាមបញ្ចេញវីដេអូរួមភេទទារប្រាក់ចំនួន១០លានរៀលពីនារីជាដៃគូសង្សារ។ប៉ុន្តែនារីដែលជាសង្សារបានដាក់ពាក្យបណ្ដឹងទៅសមត្ថកិច្ចដើម្បីចោទប្រកាន់ទៅលើបុរសជាសង្សាររបស់ខ្លួនកាលពីថ្ងៃទី២៥ខែសីហាឆ្នាំ២០២០។
បន្ទាប់ពីនារីរងគ្រោះបានដាក់ពាក្យបណ្ដឹងរួចមកខាងកម្លាំងនគរបាលខេត្តក៏បានស៊ើបអង្កេតនិងប្រើនីតិវិធីដើម្បីចាប់ខ្លួនបុរសរូបនោះ។ក្រោយពីឃាត់ខ្លួនរួចហើយក៏ត្រូវបានបញ្ជូនទៅកាន់សាលាដំបូងខេត្តដើម្បីចាត់ការបន្ត។នៅថ្ងៃទី៣ខែកញ្ញាឆ្នាំ២០២០លោកអួងវុទ្ធាចៅក្រមស៊ើបសួរសាលាដំបូងខេត្តស្ទឹងត្រែងបានសម្រេចចោទប្រកាន់ឈ្មោះចាន់ភ័ត្រាពីបទគំរាមកំហែងកេរ្ត៍ប្រព្រឹត្តនៅភូមិស្រែពោធិ៍សង្កាត់ស្រះឫស្សី ក្រុងស្ទឹងត្រែង៕
