អាវុធហត្ថចាប់ជនសង្ស័យ៣នាក់ ពាក់ព័ន្ធករណីគ្រឿងញៀន

ព្រះវិហារ៖កម្លាំងអាវុធហត្ថស្រុកបានចុះបង្ក្រាបករណីរក្សាទុកគ្រឿងញៀននិងចាប់ជនសង្ស័យចំនួន៣នាក់ នៅភូមិរលំថ្ម ឃុំរំដោះស្រែ ស្រុកជាំក្សាន្ត ខេត្តព្រះវិហារកាលពីវេលាម៉ោងជាង១១ថ្ងៃទី៣០ ខែមីនាឆ្នាំ២០២២។
មន្ត្រីអាវុធហត្ថបានឱ្យដឹងថា ក្នុងប្រតិបត្តិការនេះ កម្លាំងកងរាជអាវុធហត្ថស្រុកជាំក្សាន្តបាន ចុះបង្ក្រាបករណីរក្សាទុកនិងផ្តល់ទីតាំងជួញដូរ ប្រើប្រាស់ចែកចាយបន្តនូវសារធាតុញៀនខុសច្បាប់ និងលួចលាក់រក្សាទុកនូវអាវុធគ្មានច្បាប់ ។
ជនសង្ស័យទាំង៣នាក់ ខាងលើឈ្មោះ អាត ភារ៉ា អាយុ៤២ឆ្នាំ ឈ្មោះ ពេជ្រ បូរ៉ា អាយុ៣៥ឆ្នាំនិងឈ្មោះ ឈឺន គឹមឆាយ អាយុ២៤ឆ្នាំ។ពួកគេ រស់នៅភូមិសែរុងរឿង១ ឃុំទឹកក្រហម ស្រុកជាំក្សាន្ត ខេត្តព្រះវិហារ។
វត្ថុតាងចាប់បាន ម្សៅក្រាមសង្ស័យគ្រឿងញៀន៦កញ្ចប់ កាំភ្លើង CKC កាត់ចំនួន១ដើម, គ្រាប់អាកា៤៧ចំនួន២១គ្រាប់, គ្រាប់វាំងដឺឡុង១២គ្រាប់, គ្រាប់M16 ចំនួន៥គ្រាប់, ដាវ២ដើម, ទូរសព្ទ៤គ្រឿង,លុយខ្មែរ៥ម៉ឺនរៀល,កាណុងកាំភ្លើងច្នៃចំនួន២។បច្ចុប្បន្នជនសង្ស័យជាមួយវត្ថុតាង ត្រូវបានកម្លាំងជំនាញអាវុធហត្ថស្រុកជាំក្សាន្តបញ្ជូនបន្តទៅអាវុធហត្ថខេត្តព្រះវិហារ ដើម្បីចាត់ការតាមនីតិវិធី៕