ភ្នំពេញ៖ អាជ្ញាធររាជធានីភ្នំពេញបានបញ្ជាឱ្យអង្គភាពលូទឹក ស្តារប្រឡាយបឹងហា ប្រវែង ១.០០០ម៉ែត្រទទឹង២៧ម៉ែត្រជាមួយនិងពង្រីកផ្លូវសងខាងប្រឡាយប្រវែង១៥ម៉ែត្រ ដោយចាប់ពីគល់ស្ពានព្រៃសរហូតដល់បូរីប៉េង ហួត។ស្ថិតនៅក្នុងសង្កាត់ព្រៃសនិងសង្កាត់ដង្កោ ខណ្ឌដង្កោ ដើម្បីកាយមុខទឹក បើកផ្លូវទឹកឱ្យទឹកហូរទៅកាន់បឹងជើងឯង ក្រោយពីម្ចាស់បុរីឃាង ហេង ចាក់ដីជ្រេលចូលប្រឡាយជាច្រើនម៉ែត្រកន្លងមកនេះ។
លោកដួងចាន់សារ៉ាត់ប្រធានអង្គភាពលូទឹកបូមទឹកនៃមន្ទីរសាធារណការនិងដឹកជញ្ជូនរាជធានីភ្នំពេញបានឱ្យដឹងថា៖ការងារនេះក្រុមការងារនៃមន្ទីរសាធារណការនិងដឹកជញ្ជូនរាជធានីភ្នំពេញបានចាប់ផ្តើមអនុវត្តតាំងពីថ្ងៃទី២១ ខែកក្កដាឆ្នាំ២០២០កន្លងមកម្លេះគឺ ក្រោយពីមានការណែនាំពីលោកឃួង ស្រេង អភិបាលរាជធានីភ្នំពេញ។
លោកដួង ចាន់សារ៉ាត់ បានបន្តថា ៖ពាក់ព័ន្ធនឹងការងារនេះដែរ លោកឃួង ស្រេង ក៏បានបញ្ជាអាជ្ញាធរខណ្ឌចុះ វាស់វែងនិងបោះព្រំកំណត់ដីប្រឡាយឱ្យបានត្រឹមត្រូវ មុននៃការស្តារប្រឡាយនេះ ដោយសារតែកន្លងមកនេះ ម្ចាស់បុរី ឃាង ហេងបានចាក់ដីជ្រេលចូលទៅក្នុងប្រឡាយបឹងហា បណ្ដាលឱ្យលិចលង់លំនៅស្ថានប្រជាពលរដ្ឋនៅក្នុងភូមិថ្មីសង្កាត់ដង្កោខណ្ឌដង្កោ៕