កំពត៖ស្ត្រីម្នាក់ត្រូវរថយន្តពោងផ្ទុកស៊ីម៉ងតិ៍បុកបណ្តាលឱ្យស្លាប់ពេលកំពុងដើរឆ្លងថ្នល់។ហេតុការណ៍នេះបានកើតឡើងនៅលើកំណាត់ផ្លូវជាតិលេខ៣៣ស្ថិតក្នុងភូមិកណ្តាលទួលឃុំកំពង់ត្រាចខាងលិច ស្រុកកំពង់ត្រាចកាលពីរសៀលថ្ងៃទី២៩ខែកក្កដាឆ្នាំ២០២០។
មន្ត្រីនគរបាលចរាចរណ៍ខេត្តកំពតបានឱ្យដឹងថា៖ស្ត្រីដែលបាត់បង់ជីវិតក្នុងករណីគ្រោះថ្នាក់ចរាចរណ៍នោះឈ្មោះង៉ែតនូចអាយុ៥៤ឆ្នាំនៅភូមិស្រូវលើឃុំដងទង់ស្រុកដងទង់ខេត្តកំពត។សមត្ថកិច្ចបានបន្តថា៖គ្រោះថ្នាក់ចរាចរមួយនេះគឺរថយន្តធុនធំពោងផ្ទុកស៊ីម៉ងតិ៍បានបើកបុកអ្នកថ្មើរជើងម្នាក់បណ្តាលឱ្យស្លាប់នៅនឹងកន្លែង។
សមត្ថកិច្ចបានបញ្ជាក់ថាមុនគ្រោះថ្នាក់កើតឡើងគឺស្ត្រីរងគ្រោះបានចុះពីរថយន្តកំពុងចតនៅមុខរោងចក្រពូចិនរួចដើរឆ្លងផ្លូវ។ស្របពេលនោះស្រាប់តែមានរថយន្តពោងផ្ទុកស៊ីម៉ងតិ៍បើកក្នុងល្បឿនលឿនហើយបុកជនរងពេញទំហឹងបណ្តាលឱ្យស្លាប់។ក្នុងស្ថានភាពបែបនេះអ្នកបើកបរក៏បញ្ឈប់រថយន្តរួចរត់គេចបាត់៕
ឥតមក
