ចាប់ជនសង្ស័យម្នាក់ករណីលួចគោពលរដ្ឋ៣ក្បាល

បន្ទាយមានជ័យ៖កម្លាំងនគរបាលស្រុកស្វាយចេកបានចាប់ជនសង្ស័យម្នាក់ករណីលួចគោ ពលរដ្ឋចំនួន៣ក្បាលដឹកតាមរថយន្តបម្រុងយកទៅលក់។
ចោរលួចគោនេះសមត្ថកិច្ចចាប់បាននៅលើកំណាត់ផ្លូវជាតិលេខ៥៦Aមុខវិទ្យាល័យ កកោះ ក្នុងភូមិកកោះ ឃុំស្លក្រាម ស្រុកស្វាយចេក ខេត្តបន្ទាយមានជ័យកាលពីរំលងអធ្រាត្រចូលថ្ងៃទី២៦ ខែកក្កដា ឆ្នាំ២០២១ ។
លោកវរសេនីយ៍ឯក ជា ស្លូញ អធិការនគរបាលស្រុកស្វាយចេក បានឱ្យដឹងថា ក្រោយពីទទួលព័ត៌មានពីម្ចាស់គោ ឈ្មោះ វ៉ាត់ ផុន ភេទប្រុស អាយុ៥៣ឆ្នាំថា មានចោរចូលលួចគោញីរបស់គាត់ចំនួន៣ក្បាល ដែលចងទុកនៅក្រោមផ្ទះដឹកតាមរថយន្តកូរ៉េ ។លុះរំលងអធ្រាត្រចូលថ្ងៃទី២៦ខែកក្កដាក៏ឃើញរថយន្តដូចមានភិនភាគខាងលើត្រូវកម្លាំនគរបាលបានឃាត់ត្រួតពិនិត្យមានដឹកគោញីចំនួន៣ក្បាលមែន។រីឯគោទាំង៣ក្បាលនេះបានប្រគល់ឱ្យម្ចាស់វិញ។
អ្នកបើកបររថយន្តដឹកគោ ឈ្មោះ សោន ម៉ាញ ភេទប្រុស អាយុ ៤៥ឆ្នាំ នៅភូមិស្នោ ឃុំត្រពាំងស្នោខេត្តព្រះវិហារត្រូវនគរបាលស្រុកស្វាយចេកយកមកសួរនាំនិងចាត់ការតាមនីតិវិធី៕