ភ្នំពេញ៖ដើម្បីចូលរួមសកម្មភាពសេដ្ឋកិច្ចនិងផ្ដល់ការងារឡើងវិញរដ្ឋបាលរាជធានីភ្នំពេញបានអនុញ្ញាតឱ្យម្ចាស់អាជីវកម្មក្លឹបកម្សាន្តនិងខារ៉ាអូខេ ទាំងអស់នៅរាជធានីភ្នំពេញបើកដំណើរការឡើងវិញ ។ ប៉ុន្តែម្ចាស់អាជីវកម្មទាំងអស់គោរពឱ្យបានម៉ឺងម៉ាត់នូវវិធានការនៃក្រសួងសុខាភិបាលក្នុងការទប់ស្កាត់នូវការរីករាលដាលនៃជំងឺកូវីដ-១៩ និងវិធានការសុវត្ថិភាពរបស់ក្រសួងទេសចរណ៍ ។
នេះយោងតាមសេចក្តីជូនដំណឹងស្ដីពីការអនុញ្ញាតឱ្យម្ចាស់អាជីវកម្មក្លិបកម្សាន្តនិងខារ៉ាអូខេទាំងអស់នៅរាជធានីភ្នំពេញបើកដំណើរការដោយប្រែក្លាយទៅជាភោជនីយដ្ឋាន។តាមសេចក្តីប្រកាសព័ត៌មានលេខ០៥ប្រកពចុះថ្ងៃទី៣ខែកក្កដាឆ្នាំ២០២០របស់ទីស្ដីការគណៈរដ្ឋមន្ត្រីស្ដីពីលទ្ធផលនៃសម័យប្រជុំពេញអង្គគណៈរដ្ឋមន្ត្រី។
ក្នុងសេចក្តីជូនដំណឹងនេះមានន័យថា៖រដ្ឋបាលរាជធានីភ្នំពេញសូមជម្រាបជូនដំណឹងដល់ម្ចាស់អាជីវកម្មក្លិបកម្សាន្តនិងខារ៉ាអូខេទាំងអស់នៅរាជធានីភ្នំពេញឱ្យបានជ្រាបថា៖ដើម្បីចូលរួមសកម្មភាពសេដ្ឋកិច្ចនិងផ្ដល់ការងារឡើងវិញរដ្ឋបាលរាជធានីភ្នំពេញអនុញ្ញាតឱ្យម្ចាស់អាជីវកម្មក្លិបកម្សាន្តនិងខារ៉ាអូខេទាំងអស់នៅរាជធានីភ្នំពេញបើកដំណើរការដោយប្រែក្លាយទៅជាភោជនីយដ្ឋាន។
ប៉ុន្តែម្ចាស់អាជីវកម្មត្រូវ៖១,សុំលិខិតអនុញ្ញាតអាជីវកម្មតាមយន្តការច្រកចេញចូលតែមួយរាជធានីភ្នំពេញ។២,គោរពឱ្យបានម៉ឺងម៉ាត់នូវវិធានការនៃក្រសួងសុខាភិបាលក្នុងការទប់ស្កាត់នូវការរីករាលដាលនៃជំងឺកូវីដ-១៩ និងវិធានការសុវត្ថិភាពរបស់ក្រសួងទេសចរណ៍។ទទួលបានសេចក្តីជូនដំណឹងនេះ សូមម្ចាស់អាជីវកម្មក្លិបកម្សាន្តនិងខារ៉ាអូខេទាំងអស់មេត្តាជ្រាបនិងអនុវត្តប្រកបដោយស្មារតីទទួលខុសត្រូវខ្ពស់៕
