ភ្នំពេញ៖ចំពោះការបង្ហោះរូបភាពនិងការសរសេរខ្លឹមសាររបស់ម្ចាស់គណនីហ្វេសប៊ុក SeylaAAiថា“អម្បាញ់មិញនេះមានករណីបាញ់ប្រហារលោកឧកញ៉ាដេវីតឆាណាវ៉ា?”កាលពីរសៀលថ្ងៃទី២៧ខែមិថុនាឆ្នាំ២០២០បានធ្វើឱ្យប្រជាពលរដ្ឋមានការភ័ន្តច្រឡំនិងបង្កឱ្យមានការជ្រួលច្របល់នៅក្នុងសង្គមយ៉ាងខ្លាំង។
បន្ទាប់ពីបង្កឱ្យមានការភ័ន្តច្រឡំនោះម្ចាស់គណនីហ្វេសប៊ុកSeylaAAiបានបញ្ជាក់ថារូបភាពដែលខ្លួនបង្ហោះនេះគឺជាឈុតឆាកថតកុននោះទេមិនមែនជាករណីបាញ់ប្រហារពិតនោះឡើយ។រីឯគណនីហ្វេសប៊ុកឈ្មោះកូនមានវាសនា(របស់លោកឧកញ៉ាដេវីតឆាណាវ៉ា)បានសរសេរថា“សូមកុំច្រឡំខ្ញុំបាទថតខ្សែភាពយន្ត”។
មជ្ឈដ្ឋានមួយចំនួនបានចោទសួរថាតើពួកគេបង្ហោះរូបភាពបែបនេះនិងខ្លឹមសារថាមានការបាញ់ប្រហារតើពួកគេចង់បានអ្វី?ចង់បានការចាប់អារម្មណ៍ចង់ល្បីឬក៏ចង់បំពុលសង្គមឱ្យមានការជ្រួលច្របល់?។ តើសមត្ថកិច្ចគួរតែមានវិធានការបែបណាចំពោះអ្នកបង្ហោះបែបនេះ?។
លោកឧត្តមសេនីយ៍ឯកឆាយគឹមខឿនអ្នកនាំពាក្យអគ្គស្នងការដ្ឋាននគរបាលជាតិបានថ្លែងថាក្នុងនាមសមត្ថកិច្ចសូមសំណូមពរដល់អ្នកលេងហ្វេសប៊ុកឱ្យមានការពិចារណាថា ការបង្ហោះរបស់ខ្លួននេះ វាធ្វើឱ្យប៉ះពាល់បង្កចលាចលដល់សង្គម និងបានបង្ហាញឆ្លុះបញ្ចាំងឱ្យមជ្ឈដ្ឋានខាងក្រៅឃើញថា សន្តិសុខនៅកម្ពុជាមានបញ្ហា។ពេលខ្លះ វាអាចប៉ះពាល់ដល់កិត្តិយសសាម៉ីខ្លួនទៀតផង។
សំណូមពរដល់សាធារណៈជនទាំងអស់និងអ្នកលេងហ្វេសប៊ុកនិងអ្នកចូលចិត្តស៊ែរបន្តសូមពិចារណាផងកុំជ្រួលច្របល់តាមការបង្ហោះដោយគ្មានមូលដ្ឋានច្បាស់លាស់និងសុំកុំនាំគ្នាធ្វើការសន្និដ្ឋានមុនពេលសមត្ថកិច្ចរកឃើញការពិត។ស្នើសុំអ្នកលេងហ្វេសប៊ុកទាំងអស់បើបង្ហោះព័ត៌មានអ្វីត្រូវបញ្ជាក់ឱ្យបានច្បាស់លាស់ពេលវេលាទីកន្លែងផង។
បើសិនជាគ្មានមូលដ្ឋានច្បាស់លាស់ទេវាទៅជាពុលដល់សមត្ថកិច្ចខំស្រាវជ្រាវរកពេលខ្លះធ្វើឱ្យពួកឱកាសនិយមឆ្លៀតយកបញ្ហានេះវ៉ៃតម្លៃមកលើសមត្ថកិច្ចវ៉ៃតម្លៃមកលើសមត្ថភាពអាជ្ញាធរ៕
