ពោធិ៍សាត់៖បុរសម្នាក់ជក់បារីបណ្ដើរចាក់ប្រេងសាំងចេញពីប៊ីដុងចូលក្នុងដបបណ្តើរត្រូវភ្លើងបានឆាបឆេះរលាកពេញខ្លួនរងរបួសធ្ងន់ធ្ងររួមនិងសម្ភារជាច្រើនឆេះអស់គ្មានសល់។ហេតុការណ៍នេះបានកើតឡើងនៅក្នុងភូមិវាលឃុំសំរោងស្រុកភ្នំក្រវាញខេត្តពោធិ៍សាត់កាលពីរសៀលថ្ងៃទី២៩ខែមករាឆ្នាំ២០២១។
សមត្ថកិច្ចបានដឹងថា៖នៅមុនពេលកើតហេតុម្ចាស់តូបបានបូមប្រេងសាំងបណ្ដើរជក់បារីបណ្ដើរទើបបានបង្កជាភ្លើងឆាបឆេះរលាកពេញខ្លួនរបួសធ្ងន់ធ្ងរ។តូបលក់ដូរត្រូវបានអគ្គិភ័យឆាបឆេះអស់ទាំងស្រុងនេះមានទំហំ៤ម៉ែត្រគុណនឹង៤ម៉ែត្រដំបូលប្រក់ស័ង្កសីជញ្ជាំងបាំងស័ង្កសីរនាបក្រាលក្ដារ។
សមត្ថកិច្ចបានបន្តថា៖ម្ចាស់តូបលក់ដូរឈ្មោះណុបដែនភេទប្រុសអាយុ២៣ឆ្នាំរងរបួសធ្ងន់ត្រូវបញ្ជូនទៅសង្រ្គោះភ្លាមៗនៅមន្ទីរពេទ្យបង្អែកស្រុកភ្នំក្រវាញ។ក្នុងករណីនេះសម្ភារខូចខាត៖ម៉ូតូ១គ្រឿង,ពងទាកូន២០០គ្រាប់,ប្រហិត១២គីឡូក្រាម,ស្រាបៀរ៩កេស,ភេសជ្ជៈ២៣កេស,ទឹកដោះគោកូនក្មេង២កេស,និងលុយចំនួន៥០ម៉ឺនរៀល៕សហការី
