បាត់ដំបង៖នៅថ្ងៃទី២៣ខែធ្នូឆ្នាំ២០២០នេះសមត្ថកិច្ចស្រុកសំពៅលូនបានឃាត់ខ្លួនជនម្នាក់ក្រោយពីវាយបំផ្លាញព្រះពុទ្ធបដិមា និងសមិទ្ធផលជាច្រើនទៀតក្នុងវត្តអូរជុំឧត្តមសាមគ្គីនិងវត្តសាស្តារ។
លោកពេជ្រសារ៉ែនអធិការនគរបាលស្រុកសំពៅលូនបានប្រាប់ឱ្យដឹងថា៖ក្រោយទទួលបានពាក្យបណ្តឹងភ្លាមៗកម្លាំងរបស់លោកបានកំណត់មុខសញ្ញាឃាត់ខ្លួនជនដៃដល់ដែលបានវាយបំផ្លាញព្រះពុទ្ធរូបជាច្រើនអង្គនៅក្នុងវត្តចំនួន២ គឺវត្តអូរជុំឧត្តមសាមគ្គីនិងវត្តតាស្តា។ ជនបង្កមានឈ្មោះយួសតុលាភេទប្រុសអាយុ២៩នៅក្នុងភូមិត្រពាំងព្រលិតឃុំសន្តិភាពស្រុកសំពៅលូនខេត្តបាត់ដំបងបានធ្វើសកម្មភាពយកដំបងឈើជ្រុងវាយបំផ្លាញទៅលើព្រះពុទ្ធរូបនិងសមិទ្ធផលក្នុងវត្តដែលទើបកសាងថ្មីអស់ជាច្រើន។
ជនខាងលើបានធ្វើសកម្មភាពលើកបោះបោកព្រះពុទ្ធរូបនិងយកដំបងឈើជ្រុងវាយបំផ្លិចបំផ្លាញលើកទី១ នៅក្នុងវត្តអូរជុំឧត្តសាមគ្គី ស្ថិតក្នុងភូមិអូរ ឃុំសន្តិភាពកាលពីរំលងអធ្រាត្រ ថ្ងៃទី២៣ ខែធ្នូ ឆ្នាំ២០២០។លើកទី២ វាយបំផ្លាញព្រះពុទ្ធរូបដូចគា្នទៀតនៅព្រឹកថ្ងៃដដែល ក្នុងវត្តសុវណ្ណគីរីតាស្តា ស្ថិតក្នុងភូមិតាស្តា ឃុំតាស្តា ស្រុកសំពៅលូន បណ្តាលឱ្យខូចខាតសមិទ្ធផលនានារួមទាំងពុទ្ធបដិមាធំ តូចជាច្រើនទៀត។
តាមការបញ្ជាក់ពីសាច់ញាតិអះអាងថា៖ជនបង្កធ្លាប់មានបញ្ហាដូងធ្លាក់ត្រូវក្បាលកាលពីកន្លងមកហើយការប៉ះទង្គិចនេះបានធ្វើទុកយូរៗម្តងដោយតែងតែធ្វើសកម្មភាពខុសឆ្គងជារឿយៗទាំងមិនដឹងខ្លួន ។នៅពេលចុងក្រោយជននេះបានចេញពីផ្ទះអស់ជាច្រើនថ្ងៃបាត់ដំណឹងរហូតទើបតែសមត្ថកិច្ចឃាត់ខ្លួនទើបដឹង។
លោកអធិការបានបន្តថា៖ចំណាត់ការបន្តកម្លាំងជំនាញកំពុងស្រាវជ្រាវពីប្រវត្តិសុខភាព។ប៉ុន្តែមិនទាន់សម្រេចថានិងត្រូវកសាងសំណុំរឿងបញ្ជូនទៅតុលាកានៅឡើយទេ៕សហការី
