ខេត្តព្រះវិហារ៖កាលពីរសៀលថ្ងៃទី៣០ខែវិច្ឆិកាឆ្នាំ២០២០លោក ពឹងទ្រីដាប្រធានមន្ទីរកសិកម្ម រុក្ខាប្រមាញ់និងនេសាទខេត្តព្រះវិហារបានឱ្យដឹងថាៈពេញមួយខែវិច្ឆិកាឆ្នាំ២០២០នេះមានឧបករណ៍នេសាទល្មើសច្បាប់ចំនួន២០ករណីវត្ថុតាងមួយចំនួនត្រូវបានបង្ក្រាបនិងរឹបអូសនៅតាមដងស្ទឹងសែន។
ប្រធានមន្ទីររូនេះបានឱ្យដឹងទៀតថាៈក្នុងខែវិច្ឆិកាឆ្នាំ២០២០នេះមន្ត្រីខណ្ឌជលផលនៃមន្ទីរកសិកម្មរុក្ខាប្រមាញ់និងនេសាទខេត្តបានសហការជាមួយមន្ត្រីនគរបាលមូលដ្ឋានចុះធ្វើអធិការកិច្ចត្រួតពិនិត្យបង្ក្រាបទប់ស្កាត់បទល្មើសជលផលនៅតាមដងស្ទឹងសែន។ក្នុងនោះធ្វើអង្កេតលើឧបករណ៍នេសាទដោយប្រើប្រាស់តាមកម្មវិធីSMART TOOLS។
លោក ពឹងទ្រីដាបានបន្តថាៈជាលទ្ធផលបានរកឃើញឧបករណ៍នេសាទមានលក្ខណស្របច្បាប់ចំនួន ១៤២ឧបករណ៍ស្មើនឹង៣៨ករណីនិងឧបករណ៍នេសាទល្មើសច្បាប់ចំនួន២២ឧបករណ៍ស្មើនឹង២០ករណីរួមមាន៖ឧបករណ៍ដាយត្រី១គ្រឿងប្រវែង៧ម៉ែត្រ,ឧបករណ៍លបកន្ទុយចំនួន២គ្រឿងប្រវែង៣៤ម៉ែត្រ,ឧបករណ៍ឆក់ត្រី៦គ្រឿង,ឧបករណ៍របាំងរាវព្រួលនិងលូស្បៃមុងចំនួន១៤មាត់(របាំងរាវនិងលូស្បៃមុងប្រវែង៣៩០ម៉ែត្រ។បង្គោលចំរឹងឫស្សី៦៥ដើមនិងប្រលែងកូនត្រីចម្រុះ១២គីឡូក្រាម។
លោក ពឹងទ្រីដាបានបញ្ជាក់ថាៈចំពោះឧបករណ៍នេសាទល្មើសច្បាប់ទាំងនោះត្រូវបានដកហូត និងយកទៅកម្ទេចចោល។ជាមួយគ្នានេះដែរលោកក៏បានអំពាវនាវឱ្យប្រជាពលរដ្ឋពិសេសប្រជាពលរដ្ឋដែលមានមុខរបរនេសាទត្រីត្រូវចូលរួមថែរក្សាធនធានមច្ឆជាតិឱ្យបានគង់វង្សដោយឈប់ប្រើឧបករណ៍ខុសច្បាប់គ្រប់ប្រភេទដែលធ្វើឱ្យពូជត្រីឆាប់បាត់បង់និងធ្វើឱ្យខ្លួនយើងប្រឈមមុខនឹងផ្លូវច្បាប់ទៀតផង៕សហការី
