ភ្នំពេញ៖បុរសម្នាក់បើកម៉ូតូសណ្ដោងរឺម៉កក្នុងល្បឿនលឿនបានជ្រុលទៅបុករថយន្តពីក្រោយបណ្ដាលឱ្យស្លាប់។ហេតុការណ៍បានកើតឡើងនៅត្រង់រង្វង់មូលស្ថិតក្នុងសង្កាត់ព្រែកលាបខណ្ឌជ្រោយចង្វារកាលពីព្រឹកថ្ងៃទី១វិច្ឆិកាឆ្នាំ២០២០។
សាក្សីបានឱ្យដឹងថាមុនពេលកើតហេតុមានរថយន្តម៉ាកHINOប្រភេទដឹកទំនិញពណ៌សពាក់ស្លាកលេខភ្នំពេញ2AR3793មកឈប់នៅចំណុចទីតាំងដែលជាចំណុចផ្លូវកោងដោយរង់ចាំដឹកកម្មករសំណង់ជាច្រើននាក់ទៅធ្វើការ។ខណៈពេលកំពុងតែរង់ចាំកម្មករឡើងលើរថយន្តក៏មានបុរសម្នាក់បើកម៉ូតូសណ្ដោងរឺម៉កដោយមានដឹកសរសៃគុយទាវនិងរវល់តែឈ្ងោកចុចទូរស័ព្ទក៏ជ្រុលទៅបុករថយន្តពីក្រោយបណ្តាលឱ្យបែកក្បាលស្លាប់ភ្លាមនៅលើម៉ូតូ។
សមត្ថកិច្ចបានឱ្យដឹងថាៈជនរងគ្រោះឈ្មោះ សាមុន ដារ៉ា អាយុ៣៩ឆ្នាំ មុខរបរកម្មករសិប្បកម្មគុយទាវ នៅសង្កាត់បាក់ខែងមានប្រពន្ធកូន២នាក់ស្រុកកំណើតនៅភូមិព្រែកក្របៅឃុំព្រែកក្របៅស្រុកខ្សាច់កណ្តាលខេត្តកណ្តាល។ក្រោយកើតហេតុទាំងរថយន្តនិងម៉ូតូសណ្ដោងរឺម៉កមន្ត្រីនគរបាលចរាចរណ៍រាជធានីភ្នំពេញយកទៅរក្សាទុកដើម្បីរង់ចាំការដោះស្រាយតាមនីតិវិធី៕សហការី
