សៀមរាបៈជនពាលមួយក្រុមមានគ្នាប្រហែលជាង១០នាក់បានចេញពីព្រៃដោយដៃកាន់កាំបិតខ្វែវដើរមកកាប់ប្រជាពលរដ្ឋដើរហែរក្នុងពិធីបុណ្យថ្វាយផ្កាភ្លើងចេញពីវត្តមុន្នីធ្យានបណ្តាលឱ្យរបួសធ្ងន់ចំនួន៣នាក់។ករណីនេះបានកើតឡើងនៅតាមបណ្តោយផ្លូវក្នុងភូមិដានរុន ឃុំដានរុនស្រុកសូទ្រនិគម ខេត្តសៀមរាបកាលពីយប់ថ្ងៃទី១ខែវិច្ឆិកាឆ្នាំ២០២០។
មន្ត្រីសមត្ថកិច្ចបានឱ្យដឹងថាៈប្រជាពលរដ្ឋក្នុងភូមិដានរុនបាននាំគ្នាដើរហែរក្នុងពិធីបុណ្យថ្វាយផ្កាភ្លើងចេញពីវត្តមុន្នីធ្យានទាំងយប់តាមដងផ្លូវកាត់ពីភូមិមូយចូលទៅភូមិ។ដល់ពាក់កណ្តាលផ្លូវស្រាប់តែប្រទះឃើញពួកជនដៃដល់មានគ្នាប្រហែលជាង១០នាក់រត់ចេញមកពីកៀនផ្លូវក្នុងព្រៃដោយដៃមានកាន់កាំបិតខ្វែវដេញកាប់ពួកគាត់ធ្វើឱ្យប្រជាពលរដ្ឋព្រមទាំងអាចារ្យរត់គេចខ្លួន។
មន្ត្រីដដែលបានបន្តថាៈក្នុងនោះ២នាក់កាប់ត្រូវក្បាលផ្នែកខាងក្រោយនិងម្នាក់ទៀតដាច់កដៃខាងស្តាំនិងក្បាល។ក្រោយពីធ្វើសកម្មភាពហើយក្រុមជនគេបានរត់គេចខ្លួនបាត់អស់។ជនរងគ្រោះឈ្មោះ វី លីយ៉ាភេទប្រុសអាយុ២៧ឆ្នាំជាបុគ្គលិកសមិទ្ធផលហ្វាយណាន់នៅភូមិក្រាំងខ្ចាយឃុំសំរោងស្រុកសូទ្រនិគម ខេត្តសៀមរាប។
បច្ចុប្បន្នជនរងគ្រោះទាំង៣នាក់ក្នុងនោះ២នាក់សម្រាកព្យាបាលនៅមន្ទីរពេទ្យបង្អែកស្រុកសូទ្រនិគម និង ម្នាក់ទៀតដែលរបួសធ្ងន់ដាក់និងក្បាល កំពុងសម្រាកព្យាបាល នៅមន្ទីរពេទ្យ គ្លីនិក ឯកជន ស៊ឹង រិទ្ធីរ៉េត៕សហការី