បាត់ដំបង:មន្ត្រីនគរបាលខេត្តបាត់ដំបងបានព្រមានថានឹងចាប់បញ្ជូនមុខសញ្ញាដែលនៅតែប្រព្រឹត្តបទល្មើសនេសាទទៅតុលាកាដើម្បីវិនិច្ឆ័យទោស។នៅក្នុងផេកផ្លូវការរបស់ស្នងការនគរបាលខេត្តបាត់ដំបងដែលចេញផ្សាយព័ត៌មានពីករណីល្មើសនេសាទមួយលើកកាលនៅថ្ងៃទី២៩ខែតុលាឆ្នាំ២០២០នេះ។
ក្នុងផេកបានបង្ហាញជំហរអនុវត្តច្បាប់យ៉ាងតឹងរឹងបំផុតជុំវិញបទល្មើស។ពិសេសបទល្មើសនេសាទដែលរាប់សិបឆ្នាំកន្លងមកនេះស្ថាប័ននគរបាលជាតិខេត្តបាត់ដំបងមិនធ្លាប់មានការសម្តែងឆន្ទះមោះមុតសំដៅចូលរួមអភិរក្សធនធានមច្ឆជាតិនៅតំបន់ដែនទឹកបឹងទន្លេសាបឡើយ។
ការប្រកាសជាសាធារណ:នេះធ្វើឡើងបន្ទាប់ពីលោកឧត្តមសេនីយ៍ត្រីសាតគឹមសានស្នងការនគរបាលខេត្តបាត់ដំបងបានណែនាំទៅដល់ផែនការងារប្រឆាំងបទល្មើសសេដ្ឋកិច្ចសហការណ៍ជាមួយកម្លាំងនគរបាលស្រុកសង្កែឱ្យអនុវត្តចុះបង្ក្រាបបទល្មើសនេសាទដោយខុសច្បាប់កាលពីថ្ងៃទី២៨ ខែតុលា ឆ្នាំ២០២០ កន្លងមកក្នុងភូមិបឹងទឹម ឃុំតាប៉ុន ស្រុកសង្កែ ខេត្តបាត់ដំបង។
ប្រតិបត្តិការនេះកម្លាំងចុះបង្ក្រាបលើគោលដៅចំនួន៤ រួមមានចំណុចត្រស់ជុំ ចំណុចរាំងស្រោង ចំណុចអូរដងក្តារ និងចំណុចអូរជុំ ក្នុងនោះរឹបអូសបានសាច់មងប្រវែងចំនួន ២.០០០ម៉ែត្រ ឡុកចំនួន៩ រួមទាំងបង្គោលឈើសម្រាប់ចងភ្ជាប់ស្បៃបរណរ៉ាវក្រឡាល្អិតចំនួន ៧២០ដើមផងដែរ។
សម្ភារៈល្មើសច្បាប់ត្រូវកម្លាំងបង្ក្រាបដុតបំផ្លាញចោលនៅនឹងកន្លែងចំណែកឯមុខសញ្ញាប្រព្រឹត្តិអំពេីល្មេីសសមត្ថកិច្ចជំនាញកំពុងកំណត់អត្តសញ្ញាណដើម្បីរៀបចំសំណុំរឿងរួចបញ្ជូនទៅកាន់សាលាដំបូងខេត្តបាត់ដំបងសម្រេចអនុវត្តទោស៕សហការី