កណ្តាល៖ម៉ូតូបើកគេចពីរថយន្តដឹកខ្សាច់ច្រើនគ្រឿងចតចិញ្ចើមផ្លូវមុខដេប៉ូខ្សាច់មួយ ត្រូវរថយន្តធំមកពីមុខបុកម៉ូតូនោះ រួចកិនបុរសម្នាក់ឱ្យបែកក្បាលស្លាប់ភ្លាមក្នុងថ្លុកឈាម។
គ្រោះថ្នាក់ចរាចរណ៍នេះបានកើតឡើងនៅលើផ្លូវជាតិលេខ២១អារ ត្រង់មុខដេប៉ូខ្សាច់ ឡាំឆូយ-ឌីប៉ូលីក្នុងភូមិលេខ២ សង្កាត់ស្វាយរលំ ក្រុងតាខ្មៅកាលពីរសៀលថ្ងៃទី១៤ កុម្ភៈ។
សមត្ថកិច្ចបានឱ្យដឹងថា ជនរងគ្រោះដែលរថយន្តកិនស្លាប់ ឈ្មោះប្រាក់ រ៉ានុត អាយុ១៩ឆ្នាំ អ្នកបិតស្កុតម៉ូតូនៅភូមិសិត្បូ ក្រុងតាខ្មៅ ខេត្តកណ្តាល។ មុនកើតហេតុ ជនរងគ្រោះបានជិះម៉ូតូស្កុបពីផ្លាកលេខ 1IR.5757 ទៅទិញស្កុតយកមកបិតម៉ូតូឱ្យម៉ូយ។មកដល់មុខដេប៉ូខ្សាច់ខាងលើ មានរថយន្តដឹកខ្សាច់២គ្រឿងឈប់នៅចិញ្ចើមផ្លូវ។
ជនរងគ្រោះក៏គេចពីរថយន្តដឹកខ្សាច់នោះក៏ត្រូវរថយន្តធំផ្លាកលេខតាកែវ 3A.2993 មកពីមុខបុកហើយកិនជនរងគ្រោះបែកក្បាលស្លាប់ក្នុងថ្លុកឈាមតែម្តង។ក្រោយបង្កហេតុតៃកុងបានបន្ថែមល្បឿនបើកចូលក្នុងភូមិផ្លូវវាលស្រែរហូតដល់អស់ផ្លូវក៏ចុះរត់គេចខ្លួនបាត់៕
