បាត់ដំបង៖កម្លាំងនគរបាលស្រុកគាស់ក្រឡនៅព្រឹកថ្ងៃទី១៣ ខែធ្នូបានចាប់ជនសង្ស័យ២នាក់ បង្កហិង្សាដោយប្រើកាំបិតកាប់គូទំនាស់បណ្តាលឱ្យរងរបួសធ្ងន់ធ្ងរ។
សមត្ថកិច្ចបានឱ្យដឹងថា ករណីហិង្សាមានស្ថានទម្ងន់ទោសប្រដាប់ដោយកាំបិតនេះបានកើតឡើងនៅម្តុំទួលជំនាគ ភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបងកាលពីថ្ងៃទី១២ ខែធ្នូ។ ក្រោយពីទទួលបណ្ដឹងពីជនរងគ្រោះកម្លាំងនគរបាលស្រុកចុះស្រាវជ្រាវចាប់បានជនសង្ស័យ២នាក់។ក្នុងនោះឈ្មោះសម្បត្តិ សំបូរ អាយុ១៨ឆ្នាំ នៅភូមិ ឃុំខាងលើ -ឈ្មោះ សំ រស្មី អាយុ២៨ឆ្នាំនៅភូមិចែង ឃុំចែងមានជ័យ ស្រុកបាណន់ ខេត្តបាត់ដំបងជាជនដៃដល់។
ចំណែកជនរងគ្រោះឈ្មោះ ពៅ យ៉ូន អាយុ៤១ឆ្នាំនៅភូមិគោករកា ឃុំដូនបា ស្រុកគាស់ក្រឡ របួសត្រង់ក្បាល។ជនសង័្សយបានប្រាប់សមត្ថកិច្ចថា ខ្លួនពិតជាបានប្រើកាំបិតកាប់ទៅលើគូទំនាស់មែនគឺកើតឡើងពីជម្លោះពាក្យសម្តី។ក្រោយមកសមត្ថកិច្ចបានកសាងសំណុំរឿងដើម្បីបញ្ជូនបន្តតាមនីតិវិធី៕
