ប៉ៃលិន៖បុរស២នាក់ជិះម៉ូតូឌុបគ្នាបើកក្នុងល្បឿនលឿនទៅបុកគោកំពុងដើរឆ្លងផ្លូវបណ្ដាលឱ្យគោនោះងាប់និងអ្នកជិះម៉ូតូស្លាប់ទាំង២នាក់នៅនឹងកន្លែង។
មន្ត្រីនគរបាលបានឱ្យដឹងថា គ្រោះថ្នាក់ចរាចរណ៍ខាងលើបានកើតឡើងនៅជិតអាហារដ្ឋាន លាភហេង ស្ថិតក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិនកាលពីយប់ថ្ងៃទី៣ ខែវិច្ឆិកា។មុនកើតហេតុមានបុរស២នាក់ជិះម៉ូតូឌុបគ្នាបើកក្នុងល្បឿនលឿនពីកើតទៅលិច។
មកដល់កន្លែងខាងលើក៏បុកគោមួយក្បាលកំពុងដើរឆ្លងផ្លូវពេញទំហឹងបណ្ដាលឱ្យបុរស២នាក់ស្លាប់ភ្លាមនិងគោបានងាប់។ ជនរងគ្រោះជិះម៉ូតូម៉ាកហុងដាឌ្រីមផ្លាកលេខប៉ៃលិន 1C-8789 ខូចខាតយ៉ាងដំណំ។បន្ទាប់មកនគរបាលចរាចរណ៍បានយកសពទៅរក្សាទុកនៅវត្តព្រហ្មគិរីមរកតដើម្បីរង់ចាំសាច់ញាតិមកទទួលយកទៅធ្វើបុណ្យ។ផ្នែកជំនាញកំពុងស្រាវជ្រាវរកម្ចាស់គោមកដោះស្រាយតាមនីតិវិធី៕
