ភ្នំពេញៈ លោកឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ បាន ឱ្យដឹងនៅថ្ងៃទី២៥ខែសីហានេះថា គ្រោះថ្នាក់ចរាចរណ៍រយៈពេល ១១៧ថ្ងៃ គិតចាប់ពីថ្ងៃទី១ ខែឧសភា ដល់ថ្ងៃទី២៥ ខែសីហា បានកើតឡើង ៩៤៤លើក បណ្តាលឱ្យស្លាប់មនុស្សចំនួន ៤៨៦នាក់ របួសចំនួន ១៤៥០នាក់ ក្នុងនោះរបួសធ្ងន់ ៨៧៤នាក់។
អ្នកនាំពាក្យបន្តថា ដោយឡែកសម្រាប់គ្រោះថ្នាក់ចរាចរណ៍នៅថ្ងៃទី២៥ ខែសីហា កើត ឡើងចំនួន ៩លើក ស្លាប់មួយស្លាប់ និងរបួសចំនួន ១៣នាក់ ក្នុងនោះរបួសធ្ងន់ចំនួនប្រាំបីនាក់។
បើតាមរបាយការណ៍បូកសរុបលទ្ធផលការងារសុវត្ថិភាពចរាចរណ៍ផ្លូវគោក ប្រចាំឆមាសទី១ឆ្នាំ២០២០ បានឲ្យដឹងថា គ្រោះថ្នាក់ចរាចរណ៍ក្នុងឆមាសទី១ ឆ្នាំ២០២០ បានកើតឡើងចំនួន ១.៦១៩លើក បណ្ដាលឱ្យស្លាប់ចំនួន៨១៦នាក់ និងរបួសចំនួន២.៤៤៩នាក់ (របួសធ្ងន់១.១២៣នាក់) ។អ្នកស្លាប់ភាគច្រើននៅរាជធានីភ្នំពេញ ១៤៦នាក់ ខេត្តកំពង់ធំ ៦០នាក់ និងខេត្តកណ្ដាល ៥៩នាក់៕
