កែប៖រថយន្តបែនបើកបុកម៉ូតូពីក្រោយបណ្តាលឱ្យក្មេងប្រុសម្នាក់ស្លាប់ម្នាក់ទៀតរបួសធ្ងន់នៅលើផ្លូវជាតិលេខ៣៣Aក្នុងភូមិថ្មី សង្កាត់ព្រៃធំ ក្រុងកែបកាលពីរសៀលថ្ងៃទី៣០ ខែមីនា។
មន្ត្រីនគរបាលបានឱ្យដឹងថា ក្មេងប្រុសដែលស្លាប់ឈ្មោះឡាយ វិច្ឆិកា អាយុ ១៧ឆ្នាំនិងអ្នក រងរបួសឈ្មោះសាំង ពៅដារ៉ា អាយុ ១៩ឆ្នាំ។ ទាំងពីរនាក់រស់នៅភូមិទឹកក្រហម ឃុំកណ្តោល ស្រុកទឹកឈូ ខេត្តកំពត។
មុនគ្រោះថ្នាក់កើតឡើងមានក្មេងប្រុស២នាក់បានជិះម៉ូតូឌុបគ្នា ពីជើងទៅត្បូង។ ស្រាប់តែមានរថយន្តបែនបើកមកពីក្រោយយ៉ាងលឿនរួចបុកម៉ូតូពេញទំហឹងបណ្តាលឱ្យទាំងពីរនាក់ដួលដេកសន្លប់ស្តូកស្តឹង។ក្នុងស្ថានភាពបែបនោះ អ្នកបើករថយន្តបានរត់គេចបាត់បន្សល់ទុកតែរថយន្តបង្ក។ ភ្លាមៗ រថយន្តសង្គ្រោះក៏បានមកដឹកអ្នកទាំងពីរទៅកាន់មន្ទីរពេទ្យ តែក្នុងចំណោមនោះម្នាក់បានស្លាប់ព្រោះតែស្ថានភាពរបួសធ្ងន់ធ្ងរខ្លាំង៕
