ព្រះសីហនុ៖ទីក្រុងព្រះសីហនុដំណាក់កាលចុងក្រោយនេះភ្ញៀវទេសចរជាតិនិងអន្តរជាតិ តែងជួបជុំសប្បាយជាមួយក្រុមគ្រួសារមិត្តភក្តិនៅតាមអាហារដ្ឋានលើឆ្នេរសមុទ្រអូរឈើទាលយ៉ាងច្រើនកុះករហាក់មិនកង្វល់រឿងជំងឺឆ្លងកូវីដ១៩អ្វីនោះទេ។ប៉ុន្តែអាជ្ញាធររដ្ឋបាលខេត្តព្រះសីហនុបានអំពាវនាវយ៉ាងទទូចឱ្យពលរដ្ឋមហាជននិងភ្ញៀវទេសចរទាំងអស់ដែលមកលេងកម្សាន្តនៅតាមឆ្នេរសមុទ្រ មេត្តាបង្កើនការប្រុងប្រយ័ត្នការពារជំងឺកូវីដ១៩។
កាលពីយប់ថ្ងៃទី២៤ខែកក្កដាឆ្នាំ២០២០នេះមន្ត្រីមន្ទីរទេសចរណ៍ខេត្តដែលតែងចុះអង្កេតតាមតំបន់ឆ្នេរសមុទ្របានប្រាប់ថានៅឆ្នេរអូរឈើទាលក្រុងព្រះសីហនុ បច្ចុប្បន្ននេះពេលយប់មានពលរដ្ឋ មហាជន ភ្ញៀវទេសចរច្រើនណាស់ជាពិសេសនៅតាមកន្លែងលក់ដូរនិងអាហារដ្ឋាន ។មន្ត្រីដដែលបានបន្តថាៈអាជ្ញាធរបានណែនាំដល់ម្ចាស់ទីកន្លែងអាហារដ្ឋានជាញឹកញាប់ឱ្យរៀបចំអាកុលលាងសម្អាតដៃពាក់ម៉ាស់ការពារពេលបម្រើសេវាអាហារដល់ភ្ញៀវរៀបចំតុអាហារឱ្យមានគម្លាតឆ្ងាយពីគ្នាបន្តិច។មានបិទផ្សាយសេចក្តីណែនាំរបស់ក្រសួងសុខាភិបាលឬរដ្ឋបាលខេត្តអំពីវិធានការនិងសេចក្តីអំពាវនាវ ដើម្បីការពារជំងឺនេះផងដែរ៕