អ្វីដែលមេបនល្បែងទឹកភ្លៀងមានឥទ្ធិពល ត្រង់ថា, ក្រុមអ្នកលេងភ្នាល់ទឹកភ្លៀងណាមិនបង់លុយ លួចទៅលេង មើលមេឃតាមវាលស្រែ តាមក្រោមដើមពោធិ៍ គឺអោយសមត្ថកិច្ចទៅបង្ក្រាប Live ជាវីដេអូ បង្ហាញថា សមត្ថកិច្ចបង្ក្រាបបនល្បែងស៊ីសង មានស្នាដៃថែមទៀត។ ផ្ទុយទៅវិញក្រុមអ្នកលេងក្រោម(ទ)អត់ឃើញ សមត្ថកិច្ច អាជ្ញាធរ ស្ថាប័នតុលាការ មានវិធានការបង្ក្រាបនៅឡើយ។ នេះជាមូលហេតុផ្តើមដោយចំងល់ មិនបង្ក្រាបដោយសារអ្វី ?
សូមបញ្ជាក់ថា, ការភ្នាល់ទឹកភ្លៀងនៅខេត្តបាត់ដំបង គឺរាប់មុឺនដុល្លារឡើងទៅ មានន័យថា, មិនមែន(១ខាំ-២ខាំ-កន្លះគីឡូទេ) ម្នាក់ភ្នាល់យក(សើម និង ស្ងួត) ម្តងៗរាប់គីឡូ , រាប់កៅស៊ូ, ហើយកន្លែងទូរមាសទាំងអស់នៅផ្សារបឹងឈូក បង់លុយចូលលេងទឹកភ្លៀងគ្រប់គ្នា, អ្នកលេងត្រូវយកប្លង់ដី ប្លង់ផ្ទះទៅដាក់នៅទូរជញ្ជីងមាស ទើបមានសិទ្ធិឡើង(ទិញ-លក់)។ និយាយរួមការប្រមូលផ្តុំគ្នានៅក្រោម(ទ) មានមនុស្សតិចតួចទេ សំខាន់ការប្រមូលផ្តុំគ្នានៅផ្សារបឹងឈូក កុះកុញ ដើម្បីឡើង(ទិញ-លក់) ដេញហាងឆេង ចាប់តាមមេឃ មានពពក មានភ្លៀងឬអត់ ដូច្នេះអ្នកយកស្ងួតលក់, អ្នកយកសើមទិញ , ប្រដេញហាងឆេងចាប់ តម្លៃយ៉ាងកងរំពងសម្លេង អត់ខ្លាចរឿងជំងឺកូវីដ-១៩ អីបន្តិច ។ បើនិយាយពីទូរជញ្ជីងមាស ដឹងតែយកតំលៃពីអ្នក(ទិញ), និងអ្នក(លក់) ក្នុង១គីឡូ គឺ០៥ដុល្លារ , មួយកៅស៊ូ ៥ដុល្លារ , ចុះបើ១ថ្ងៃៗ មានរាប់សិបម៉ោង ហាងឆេង(ទិញ-លក់) សឹងតែ១នាទី រាប់សិបនាក់ដេញហាងឆេងគ្នា ។ បើពពកល្អ មេឃរកកលភ្លៀង ឬខ្យល់បក់ពពកនាំទឹកភ្លៀងអាចតម្រង់ចំ(ទ) ដែលគេហៅថា,កន្លែង(កែវ,និងសុីប្រូ) អ្នកទូរជញ្ជីងសប្បាយយកលុយពីការ(លក់-ទិញ)ច្រើនបំផុត។
គេមានចំងល់ថា, តើចៅហ្វាយក្រុង ,អធិការនគរបាលក្រុង , លោកស្នងការខេត្ត, លោកមេបញ្ជាការកងរាជអាវុធហត្ថខេត្ត , លោកអភិបាលខេត្ត ដែលជាគណ:បញ្ជាការឯកភាពខេត្ត បានគិតគូរបង្ក្រាបឬទេ ឬមួយចង់ដោះសារថា, ឥឡូវគេលេងភ្នាល់តាមទូរស័ព្ទបង្ក្រាបមិនកើត? មានតែក្មេងបៀមដៃទេ ដែលគាត់មិនដឹង អំពីអំពើពុករលួយជាលក្ខណះប្រព័ន្ធ ត្រូវថៅកែទឹកភ្លៀងឈ្មោះ(តាល់) បែងចែកកញ្ចប់។
ល្បីថា, ថៅកែទឹកភ្លៀង(តាល់) ត្រូវគ្នាជាមួយលោកស្នងការ បើអ្នកលេងមិនបង់លុយ គឺហៅអោយទៅចាប់តាមវាលស្រែ តាមក្រោមដើមពោធិ៍, បើអ្នកបង់លុយអាចឡើង(លក់-ទិញ)ក្រោម(ទ)ដោយសេរី។
ពាក់ព័ន្ធនិងករណីនេះលោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបងបានបញ្ជាក់ថា ចាំលោកអោយមន្ត្រីក្រោមឱវាទចុះទៅពិនិត្យ។ ដោយឡែក លោក ងួន រតនៈ អភិបាលនៃគណៈអភិបាលខេត្តបាត់ដំបង បានអោយដឹងថា លោកបានអោយអភិបាលរងខេត្តម្នាក់ដឹកនាំកម្លាំងចុះបង្ក្រាបហើយ៕
