ភ្នំពេញ៖កាលពីរសៀលថ្ងៃទី២៦ខែឧសភាឆ្នាំ២០២០កម្លាំងនគរបាលខណ្ឌមានជ័យបានផ្ទុះអាវុធ២គ្រាប់រួចឃាត់ជនសង្ស័យ២នាក់និងថ្នាំញៀនមួយចំនួន។ករណីនេះកើតឡើងនៅចំណុចដីឡូត៍ទុកចោលមួយកន្លែងនៅតាមផ្លូវលំក្រោយរោងចក្រទឹកស៊ីអ៊ីវស្ថិតក្នុងសង្កាត់ស្ទឹងមានជ័យទី២ខណ្ឌមានជ័យ ។
មន្ត្រីនគរបាលបានឱ្យដឹងថាប្រតិបត្តិការបង្ក្រាបគ្រឿងញៀននេះបានចាប់ជាក់ស្ដែងតែដោយសារក្រុមជនសង្ស័យមានគ្នាជិត២០នាក់បានរត់។ខ្លះរត់ឡើងរបងខ្លះរត់ចូលគុម្ពព្រៃស្មៅខណៈសមត្ថកិច្ចមានគ្នាតិចជាងបានដេញតាមទើបចាប់ខ្លួន២នាក់បន្ទាប់ពីជនសង្ស័យរត់ឡើងរបងមិនរួច។
ចំណែកឯជនសង្ស័យម្នាក់បានតដៃវាយទៅលើសមត្ថកិច្ចម្នាក់ដែលមានមាឌតូចជាងខ្លួនកំពុងរត់ដេញតាមចាប់ខ្លួនរូបគេនោះ។ជនសង្ស័យក៏ស្ទុះទៅរើសកូនកាំបិតមកបម្រុងចាក់សមត្ថកិច្ចទើបកម្លាំងសមត្ថកិច្ចបានផ្ទុះអាវុធឡើងលើ២គ្រាប់ដើម្បីគំរាមដល់ក្រុមជនសង្ស័យរូបនេះធ្វើឱ្យជនសង្ស័យភ័យស្លន់ស្លោរត់ចូលទៅក្នុងព្រៃសម្ងំលាក់ខ្លួន ។
បច្ចុប្បន្នកម្លាំងជំនាញកំពុងធ្វើការសាកសួរយកចម្លើយឃាត់ខ្លួននៅអធិការដ្ឋាននគរបាលខណ្ឌមានជ័យដើម្បីកសាងសំណុំរឿងចាត់ការបន្តនីតិវិធីច្បាប់៕
