ភ្នំពេញ៖ បុរសម្នាក់បើករថយន្ដក្រឡុកស៊ីម៉ងត៍បានកៀរម៉ូតូឱ្យដួលរួចកិនយុវជនម្នាក់ចំក្បាលបណ្តាលឱ្យស្លាប់ភ្លាមឯតៃកុងរថយន្តត្រូវបានឃាត់ខ្លួន។ហេតុការណ៍គ្រោះថ្នាក់ចរាចរណ៍នេះ បានកើតឡើងនៅតាមបណ្តោយផ្លូវបេតុងហ្គ្រេនភ្នំពេញក្នុងសង្កាត់ច្រាំងចំរេះ១ ខណ្ឌឫស្សីកែវ កាលពីព្រឹកថ្ងៃទី២៤ ខែមីនា ឆ្នាំ២០២១។
សមត្ថកិច្ចបានឱ្យដឹងថា៖សពជនរងគ្រោះមានឈ្មោះ ជាសុវណ្ណ ភេទប្រុស អាយុ ២៧ឆ្នាំ មុខរបរជាជាងម៉ាស៊ីនត្រជាក់ស្នាក់នៅផ្ទះជួល ផ្លូវលំក្រុម៤ ភូមិ៤ សង្កាត់ច្រាំងចំរេះ១ ខណ្ឌឫស្សីកែវ ។ ចំណែកឯតៃកុងរថយន្តបង្កឈ្មោះសាន សែន អាយុ ២៨ឆ្នាំនៅភូមិសំរោងក្អែ ស្រុកសំរោងធំ ខេត្តកណ្តាល។
សាក្សីបានឱ្យដឹងថា៖ ម៉ូតូម៉ាកឃ្លីកពណ៌ក្រហមលាយខ្មៅពាក់ផ្លាកលេខ ភ្នំពេញ 1AW-8049 បើកបរដោយយុវជនម្នាក់ តាមបណ្ដោយផ្លូវបេតុងហ្គ្រេនភ្នំពេញក៏មានរថយន្តក្រឡុកស៊ីម៉ងត៍ ពាក់ផ្លាកលេខ ភ្នំពេញ 5A-1750បើកមកពីក្រោយក្នុងល្បឿនលឿនដល់ផ្លូវបំបែកជាបួនកែងផ្លូវលេខ៥៩៨ រថយន្តបត់ស្តាំដៃ បានកៀរម៉ូតូបណ្ដាលឱ្យដួលបោកនឹងថ្នល់ចូលក្រោមកង់រថយន្តកិនស្លាប់ភ្លាម តែម្តង។
ក្រោយកើតហេតុសមត្ថកិច្ច បានចុះ វាស់វែងយកម៉ូតូនិងរថយន្តបង្កទៅរក្សាទុកនៅស្នងការដ្ឋាននគរបាលរាជធានីភ្នំពេញរង់ចាំធ្វើការដោះស្រាយគ្នានៅពេលក្រោយ៕
