ភ្នំពេញ៖ខ្មាន់កាំភ្លើងជាជនដៃដល់បានប្រើប្រាស់អាវុធខ្លីបាញ់ទៅលើបុរសអាជីវករម្នាក់ចំនួន៤គ្រាប់
តែត្រូវ៣គ្រាប់បណ្តាលឱ្យរងរបួសធ្ងន់ធ្ងរហើយបានស្លាប់ពេលបញ្ជូនទៅដល់មន្ទីរពេទ្យកាល់ម៉ែត។ករណីបាញ់ប្រហារនេះបានកើតឡើងនៅតាមផ្លូវលំក្នុងភូមិទួលកីសង្កាត់ភ្លើងឆេះរទេះខណ្ឌកំបូលកាលពីម៉ោង៣រសៀលថ្ងៃទី១៧ខែធ្នូឆ្នាំ២០២០។
ប្រភពព័ត៌មានបានឱ្យដឹងថាៈជនរងគ្រោះឈ្មោះ នៅ ចំណាន ភេទប្រុស អាយុ៤៥ឆ្នាំមុខរបរទិញដូរ លក់រថយន្ត,ម៉ូតូ,ចងការលុយនិងគួកជេរដី,ទីលំនៅភូមិព្រៃព្រីងត្បូង២សង្កាត់ចោមចៅ៣ខណ្ឌពោធិ៍សែនជ័យ។ជនរងគ្រោះមានទីលំនៅមួយកន្លែងទៀតភូមិដំណាក់ត្រយឹងសង្កាត់ចោមចៅ២ខណ្ឌពោធិ៍សែនជ័យ។
ជនរងគ្រោះក្នុងស្ថានភាពរបួសចំក្បាល១គ្រាប់,ពោះ១គ្រាប់,ដៃឆ្វេង១គ្រាប់,សភាពធ្ងន់ធ្ងរនៅកន្លែងកើតហេតុហើយបានស្លាប់ពេលបញ្ជូនដល់មន្ទីរពេទ្យកាល់ម៉ែត។ចំណែកសម្ភារជាប់ខ្លួនមិនបានបាត់បង់ឡើយ។ជនរងគ្រោះជិះម៉ូតូម៉ាកPCXពណ៌សពាក់ផា្លកលេខភ្នំពេញ1ID7477។ខ្មាន់កាំភ្លើងជិះរថយន្តតាមបាញ់៤គ្រាប់ផ្ទួនៗត្រូវ៣គ្រាប់។
ប្រភពពីសាច់ញាតិបានឱ្យដឹងថាៈមុនកើតហេតុជនរងគ្រោះដើរទារលុយគេតាមភូមិ។លុះវិលត្រឡប់មកវិញជិះម៉ូតូកាត់តាមចំណុចផ្លូវស្ងាត់ក៏មានជនដៃដល់បាញ់ប្រហារតែម្តង។ជុំវិញករណីនេះសមត្ថកិច្ចទាំងនគរបាលទាំងអាវុធហត្ថខណ្ឌកំបូលចុះទៅដល់ទីតាំងកើតហេតុនិងស្រាវជ្រាវរកឃាតកយកមកផ្តន្ទាទោសតាមច្បាប់៕សហការី
