ភ្នំពេញ៖សម្តេចតេជោហ៊ុនសែនបានប្រកាសនៅព្រឹកថ្ងៃទី៣០ខែវិច្ឆិកាឆ្នាំ២០២០ពីក្រុងសៀមរាបថាៈ លទ្ធផលធ្វើតេស្តរកមេរោគកូវីដ១៩ក្នុងព្រឹត្តិការណ៍២៨វិច្ឆិកាបានបង្ហាញថាសរុបមនុស្ស១៤នាក់ហើយដែលបានរកឃើញមានជំងឺកូវីដ១៩ បន្ទាប់ពីរកឃើញចំនួន៦ករណីបន្ថែមទៀត។
សម្តេចតេជោហ៊ុនសែនបានថ្លែងថាៈអ្នកធ្វើតេស្តពាក់ព័ន្ធព្រឹត្តិការណ៍សហគមន៍២៨វិច្ឆិកានៅទូទាំងប្រទេសមានចំនួន៣.៣៣២សំណាកមកពី៧ខេត្ត។សម្តេចតេជោហ៊ុនសែនមានប្រសាសន៍បន្តថាៈមកដល់ពេលនេះវាមានចំនួន១៤ករណីហើយប្រសិនបើត្រូវអះអាងថាទៅពីខេត្តសៀមរាបជាករណីឆ្លងមួយទៀត(កូនស្រីលោកឆែមសាវុធ)គឺនឹងមានចំនួន១៥ករណី។ប៉ុន្ដែសំណាកទើបនឹងធ្វើតេស្ដបានចំនួន២.២៤៧សំណាក ក្នុងចំណោម៣.៣៣២សំណាក។
សម្តេចតេជោហ៊ុនសែនបានបន្តថាៈថ្ងៃនេះនឹងយកសំណាកជាង២ពាន់សំណាកបន្ថែមទៀត។ក្នុងនោះតែនៅផ្សារអ៊ីអន១ជាង១ពាន់សំណាក,ធ្វើនៅក្រសួងមហាផ្ទៃនិងធ្វើនៅកន្លែងដែលកូនចៅរបស់លោកឆែមសាវុធបានទៅដល់រាប់ទាំងនៅកោះពេជ្រជាដើម។សម្តេចតេជោហ៊ុនសែនបានថ្លែងថាៈប្រតិបត្តិការទប់ស្កាត់កូវីដ១៩បានធ្វើលឿនហើយក្នុងទ្រង់ទ្រាយធំតែកន្លែងខ្លះមិនទាន់លឿននៅឡើយ។
សូមជម្រាបថា៖កម្ពុជាបានរកឃើញករណីឆ្លងជំងឺកូវីដ១៩ចូលក្នុងសហគមន៍ជាលើកដំបូងនៅថ្ងៃទី២៨ខែវិច្ឆិកាឆ្នាំ២០២០។បន្ទាប់ពីធ្វើតេស្តរកឃើញវិជ្ជមានជំងឺកូវីដ១៩លើក្រុមគ្រួសារអគ្គនាយកពន្ធនាគារកម្ពុជារួមនឹងអ្នករស់នៅជាមួយ។ក្រសួងសុខាភិបាលមិនទាន់បានរកឃើញពីប្រភពនៃការឆ្លងជំងឺកូវីដ១៩នេះនៅឡើយទេ៕សហការី
