ខេត្តព្រះវិហារ៖សកម្មភាពដឹកជញ្ជូនឈើរបស់ក្រុមឈ្មួញបានបន្តកើតមានជារៀងរាល់ថ្ងៃធ្វើឱ្យរដ្ឋបាលខេត្តព្រះវិហារដាក់ចេញនូវបទបញ្ជាដល់អាជ្ញាធរមូលដ្ឋាននិងមន្ត្រីជំនាញត្រូវតែទទួលខុសត្រូវចំពោះការកើតឡើងនៃបទល្មើសនោះ។ត្រូវរួមគ្នាអនុវត្តបទបញ្ជានេះចុះទប់ស្កាត់និងបង្ក្រាបឱ្យខាងតែបាន។
ក្រោយទទួលបានបទបញ្ជានោះមកកម្លាំងកងរាជអាវុធហត្ថស្រុកជ័យសែនបានសហការជាមួយមន្ត្រីព្រៃឈើស្ទាក់ចាប់រថយន្តសាំយ៉ុង១គ្រឿងដែលបានផ្ទុកឈើ។ក្នុងនោះកម្លាំងសមត្ថកិច្ចក្របួចបានកាលពីរសៀលថ្ងៃទី៥វិច្ឆិកាឆ្នាំ២០២០នៅក្នុងភូមិស្លែងឃុំខ្យងស្រុកជ័យសែន។
មន្ត្រីអនុវត្តច្បាប់ព្រៃឈើ បានប្រាប់ឱ្យដឹងថា រថយន្តដែលសមត្ថកិច្ចស្ទាក់ចាប់បាននោះ ជាប្រភេទរថយន្តសាំយ៉ុង ពណ៌សរ ពាក់ស្លាកលេខ ភ្នំពេញ 2P-2780 ។រថយន្តនេះគេបានរាយការណ៍ បានដឹកឈើចេញពីក្នុងតំបន់ដែនជម្រកសត្វព្រៃព្រៃឡង់ក្នុងគោលដៅយកទៅលក់នៅក្នុងខេត្តកំពង់ធំ។ប៉ុន្តែត្រូវកម្លាំងសមត្ថកិច្ចស្ទាក់ចាប់បាននៅពេលរថយន្តនោះបើគេចចូលទៅក្នុងបរិវេណផ្ទះប្រជាពលរដ្ឋ នៅក្នុងមូលដ្ឋានខាងលើ ចំណែក តៃកុងរថយន្តបានរត់គេចខ្លួនបាត់។
មន្ត្រីដដែលបានបញ្ជាក់ថាក្រោយការបង្ក្រាបរថយន្តដឹកឈើមួយគ្រឿងត្រូវនាំយកមករក្សាទុកនៅសង្កាត់រដ្ឋបាលព្រៃឈើជ័យសែន។ រីឯឈើដែលបង្ក្រាប និងដកហូតបាននោះ ឈើលេខ១ប្រភេទ កកោះមានចំនួន៥កំណាត់ស្មើនឹង១,១៧៣ម៉ែត្រគូប។ចំពោះករណីនេះមន្ត្រីព្រៃឈើនឹងកសាងសំណុំរឿង ចាត់ការតាមនីតិវិធី ៕សហការី
