ឧត្តរមានជ័យ៖នាយរងប៉ុស្តិ៍នគរបាលការពារព្រំដែនគោកម្នាក់បានបាញ់សម្លាប់នាយប៉ុស្តិ៍របស់ខ្លួននិងមន្ត្រីម្នាក់ទៀតរួចបាញ់សម្លាប់ខ្លួនឯង។ករណីបាញ់ប្រហារនេះសង្ស័យតូចចិត្តរឿងអ្វីមួយដែលដោះស្រាយជាមួយគ្នាមិនបាន។ហេតុការណ៍បានកើតឡើងនៅភូមិជើងភ្នំឃុំត្រពាំងប្រិយស្រុកអន្លង់វែងកាលពីរសៀលថ្ងៃទី៦ខែវិច្ឆិកាឆ្នាំ២០២០។
ប្រភពពីមន្ត្រីនគរបាលវរ:ការពារព្រំដែនគោកលេខ៩០៥បានឱ្យដឹងថាៈមន្ត្រីដែលបាញ់ប្រហារមានឈ្មោះអុំឈយជានាយរងប៉ុស្តិ៍ចុងព្រិចកាលពីរសៀលបានយកអាវុធប្រភេទAK៤៧ស្វាយបត់មួយដើមដើរចុះពីលើភ្នំមកផ្នែកខាងក្រោមម្នាក់ឯង។ក្នុងស្ថានភាពទឹកមុខក្រៀមក្រំហាក់តូចចិត្តក្នុងរឿងអ្វីមួយទោះជាមិត្តរួមកម្លាំងបានព្យាយាមហៅអង្វរឱ្យជិះម៉ូតូឬរថយន្តជាមួយក៏មន្ត្រីរូបនេះមិនព្រមជិះជាមួយដែរ។
លុះមកដល់ចំណុចកើតហេតុឈ្មោះហ៊ុនប៊ីជានាយប៉ុស្តិ៍ចុងព្រិចរួមនិងកម្លាំងជាមន្ត្រីម្នាក់ទៀតឈ្មោះស្រេងរាសីជានាយផ្នែកស៊ើបការណ៍បានបើករថយន្តមកដល់ហើយក៏បានឈប់ក្នុងបំណងហៅមន្ត្រីនគរបាលរូបនោះជិះទៅជាមួយគ្នា។ខណ:នោះមន្ត្រីដៃដល់បានលើកអាវុធបាញ់ប្រាវសំដៅទៅលើមន្ត្រីមេប៉ុស្តិ៍រួចបាញ់សំដៅទៅលើមន្ត្រីរួមដំណើរម្នាក់ទៀងបណ្តាលឱ្យស្លាប់ភ្លាមៗនៅកន្លែង។រួចមន្ត្រីដៃដល់បានដើរចេញពីកន្លែងកើតហេតុបានចម្ងាយប្រមាណ១០០ម៉ែត្រក៏បានបាញ់ខ្លួនឯងស្លាប់ជាក្រោយ៕សហការី