ភ្នំពេញ៖រថយន្តឡង់គ្រីស័របានបុកម៉ូតូពីក្រោយពេញទំហឹង ហើយជ្រុលផ្ទប់ជាមួយផាស្អេប បណ្តាលឱ្យបុរសជិះម៉ូតូរងរបួសបាក់ជើងម្ខាង ត្រូវរថយន្តសង្គ្រោះដឹកទៅមន្ទីរពេទ្យភ្លាមៗ។
គ្រោះថ្នាក់ចរាចរណ៍នេះបានកើតឡើងនៅមុខផ្សារសុវណ្ណា តាមផ្លូវលេខ២៧១ ស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យ កាលពីយប់ថ្ងៃទី១៥ ខែឧសភា។ សាក្សីបានឱ្យដឹងថា មុនកើតហេតុបុរសម្នាក់ជិះម៉ូតូម៉ាកហុងដាផ្លាកលេខភ្នំពេញ1 FZ-0454 តាមផ្លូវលេខ២៧១ ពីជើងទៅត្បូង។
មកដល់កន្លែងខាងលើស្រាប់តែរថយន្តម៉ាកឡង់គ្រីស័រ ផ្លាកលេខភ្នំពេញ2BS-3599 បើកមកបុកម៉ូតូពីក្រោយ ហើយម៉ូតូក៏បន្តបុកផ្ទប់នឹងផាស្អេបនៅខាងមុខបណ្តាលឱ្យដួលរងរបួសបាក់ជើងម្ខាង។បន្ទាប់មកជនរងគ្រោះត្រូវរថយន្តសង្គ្រោះដឹកទៅមន្ទីរពេទ្យភ្លាមៗ។ចំណែកម៉ូតូនិងរថយន្តសមត្ថកិច្ចបានមកយកទៅទុកដើម្បីដោះស្រាយពេលក្រោយ៕
