ម្ចាស់ជិះដេញធាក់ម៉ូតូចោរ ឲ្យដួលរួចចាប់ខ្លួនឲ្យសមត្ថកិច្ច

ភ្នំពេញ៖ចោរជិះម៉ូតូឆក់ទូរសព្ទពីបុរសម្នាក់បានសម្រេចហើយព្យាយាមបើករត់ត្រូវម្ចាស់ជិះម៉ូតូដេញតាមធាក់ម៉ូតូចោរដួលរួចអ្នកដំណើរជួយចាប់ប្រគល់ឱ្យសមត្ថកិច្ច។
មន្ត្រីនគរបាលបានឱ្យដឹងថា កាលពីរសៀលថ្ងៃទី៦ ខែមេសាជនសង្ស័យម្នាក់ឆក់ទូរសព្ទបានសម្រេចហើយព្យាយាមបើកម៉ូតូរត់តែត្រូវម្ចាស់ជិះម៉ូតូដេញតាមធាក់ ម៉ូតូចោរដួល និងមានពលរដ្ឋជួយស្ទាក់ចាប់បាន ។ករណីនេះ នៅម្តុំផ្លូវបេតុងលូ៥ ភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ។
ម្ចាស់ទូរសព្ទឈ្មោះ ប៉ៃ ប៉ោហេង អាយុ២១ឆ្នាំមុខរបរជាអ្នកដឹកជញ្ជូនរបស់ក្រុមហ៊ុនឯកជនមួយស្នាក់នៅសង្កាត់ទឹកថ្លា ខណ្ឌសែនសុខ ។ចំណែកជនសង្ស័យឈ្មោះសុខ ដែនអាយុ២០ឆ្នាំ។មុនកើតហេតុ ជនរងគ្រោះជិះម៉ូតូចេញពីម្តុំផ្សារសឡាបានទុកទូរសព្ទដៃ ម៉ាកIPhone 11pro Max នៅឃ្លុបជិតដៃចង្កូត។
ពេលនោះក៏មានចោរម្នាក់ ជិះម៉ូតូម៉ាកហុងដាសេ១២៥ ផ្លាកលេខ ភ្នំពេញ1JH-7620 មកក្បែរ រួចក៏ឆក់យកទូរសព្ទបានសម្រេច ហើយព្យាយាមបើករត់គេចខ្លួន។បន្ទាប់ពីចោរឆក់ម្ចាស់ទូរសព្ទបានជិះម៉ូតូដេញតាម ធាក់ម៉ូតូជនសង្ស័យឱ្យដួលហើយមាន ពលរដ្ឋនៅក្បែនោះ នាំគ្នាជួយដេញស្ទាក់ចាប់ប្រគល់ឱ្យសមត្ថកិច្ច៕