ចិន២នាក់ជិះម៉ូតូ បុកជាមួយរថយន្ត ស្លាប់ម្នាក់របួសធ្ងន់ម្នាក់ម្នាក់

បន្ទាយមានជ័យ៖ជនជាតិចិន២នាក់បានជិះម៉ូតូឌុបគ្នាបានបុកជាមួយរថយន្តដឹកខ្សាច់កំពុងបត់ឆ្លងផ្លូវបណ្តាលឱ្យស្លាប់ម្នាក់និងរងរបួសធ្ងន់ម្នាក់។
មន្ត្រីនគរបាលបានឱ្យដឹងថា គ្រោះថ្នាក់ចរាចរណ៍នេះបានកើតឡើងនៅតាមផ្លូវជាតិលេខ៥ ក្នុងភូមិនិមិត្ត៣ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យកាលពីយប់ថ្ងៃទី២១ខែមីនា។ជនរងគ្រោះជាតិចិន២នាក់នោះមិនទាន់ស្គាល់អត្តសញ្ញាណនៅឡើយទេ។
មុនកើតហេតុអ្នកទាំង២ បានជិះម៉ូតូម៉ាកហុងដាឌ្រីមផ្លាកលេខ បាត់ដំបង 1M-9550 ឌុបគ្នា ពីលិចទៅកើត។ ពេលមកដល់ខាងលិចប៉ុស្តិ៍នគរបាលរដ្ឋបាលនិមិត្តក៏មានរថយន្តធំដឹកខ្សាច់ បានបត់ឆ្លងផ្លូវម៉ូតូបានបុកពីចំហៀង បណ្តាលឱ្យអ្នកបើកម៉ូតូស្លាប់និង អ្នករួមដំណើររងរបួសធ្ងន់ ។ក្រោយកើតហេតុអ្នកបើករថយន្ត បានរត់គេចខ្លួនបាត់បន្សល់ទុកតែរថយន្តត្រូវសមត្ថកិច្ចបានយកទៅរក្សាទុក នៅប៉ុស្តិ៍នគរបាលរដ្ឋបាលនិមិត្ត៕