អន្តរជាតិ៖ យោងតាមទីភ្នាក់ងារសារព័ត៌មាន AFP បានចុះផ្សាយថា អភិបាលក្រុងតូក្យូអ្នកស្រី YurikoKoikeបាននិយាយថាករណីឆ្លងកូវីដ១៩ថ្មីកាលពីថ្ងៃព្រហស្បតិ៍មានរហូតដល់៣៦៦ករណី។ដែលនេះលើកទី១មានករណីប្រចាំថ្ងៃកើនលើសពី៣០០ខណៈដែលប្រទេសជប៉ុនចាប់ផ្តើមថ្ងៃឈប់សម្រាក៤ថ្ងៃចាប់ពីថ្ងៃសុក្រនេះតទៅ ។
អ្នកស្រីថ្លែងក្នុងសន្និសីទព័ត៌មានថាចំនួនច្រើននេះមួយផ្នែកដោយសារមានការធ្វើតេស្តច្រើនមិនធ្លាប់មាន។ប៉ុន្តែអ្នកជំនាញជប៉ុន បានព្រមានថា មានសញ្ញាថា វីរុសកូរ៉ូណាដែលបង្កទៅជាជំងឺកូវីដ១៩ កាន់តែឆ្លងខ្លាំងឡើងៗដោយមិនត្រឹមតែឆ្លងក្នុងចំណោមយុវជនដែលទៅកម្សាន្តនៅក្លិបរាត្រីដូចការគិតពីមុនប៉ុណ្ណោះទេ។ប៉ុន្តែវាបានឆ្លងដល់មនុស្សចាស់នៅតាមផ្ទះកន្លែងធ្វើការនិងភោជនីយដ្ឋានទៀតផង ។
ប្រទេសជប៉ុនទាំងមូល ក៏មានការកើនករណីឆ្លងកូវីដ១៩ ដោយកាលពីថ្ងៃពុធ បានរាយការណ៍ ៧៩៥ ករណីថ្មីដែលនេះជាចំនួនច្រើនជាងករណីដែលខ្ពស់បំផុតរបស់ជប៉ុនកាលពីខែមេសា។អភិបាលក្រុងតូក្យូបានសុំឱ្យប្រជាជនស្ថិតនៅផ្ទះក្នុងពេលឈប់សម្រាកច្រើនថ្ងៃចុងសប្តាហ៍នេះ។ទោះបីនាយករដ្ឋមន្ត្រីជប៉ុនលោកShinzoAbeបានសម្រេចធ្វើយុទ្ធនាការជំរុញទេសចរណ៍ក្នុងស្រុកដោយមិនរួមបញ្ចូលក្រុងតូក្យូក៏ដោយ ។
ទូទាំងប្រទេសជប៉ុន គិតមកដល់ថ្ងៃសុក្រនេះ មានអ្នកឆ្លងវីរុសកូរ៉ូណា២.៧០២៩ករណីអ្នកស្លាប់សរុប ៩៩០នាក់ និងព្យាបាលបានជាសះស្បើយ ចំនួន ២១.០៣៥នាក់៕
