រន្ទះបានបាញ់ចំក្រុមមនុស្ស៥នាក់ កំពុងអង្គុយជុំគ្នាក្រោមតង់កៅស៊ូស្លាប់ម្នាក់របួសធ្ងន់៤នាក់

ស្វាយរៀង៖ ភ្លៀងជាមួយខ្យល់កន្ត្រាក់ក៏មានរន្ទះផងបានបាញ់ចំក្រុមមនុស្សដែលកំពុងអង្គុយលើគ្រែជុំគ្នាក្រោមតង់កៅស៊ូបណ្តាលឱ្យស្លាប់ម្នាក់របួសធ្ងន់៤នាក់។ហេតុការណ៍គួរឱ្យរន្ធត់តក់ស្លុតនេះបានកើតឡើងនៅភូមិត្រពាំងបន្ទាយ ឃុំអណ្ដូងពោធិ៍ស្រុករមាសហែកខេត្តស្វាយរៀងកាលពីយប់ថ្ងៃទី១៩ខែឧសភាឆ្នាំ២០២១។
លោកសំ សំអុល អធិការនគរបាលស្រុករមាសហែកបានឱ្យដឹងថា៖បុរសដែលស្លាប់ឈ្មោះ យ៉ង មករាហៅជាងខ្លីអាយុ២២ឆ្នាំ។ឯបុរសរងរបួស,ឈ្មោះ ប៉ាង នឿនអាយុ៤៤ឆ្នាំ,ឈ្មោះ ឡុក សារូអាយុ ៣៨ឆ្នាំ,ឈ្មោះឃឹម សាម៉នអាយុ២៨ឆ្នាំ,ឈ្មោះគឹម ស៊ីថាអាយុ ៤៩ឆ្នាំអ្នកទាំង៥ជាកម្មករសំណង់ រស់នៅភូមិត្រពាំងជ័រ ឃុំអណ្ដូងពោធិ៍ ស្រុករមាសហែក ។
លោកអធិការនគរបាលស្រុកបានបន្តថា៖ មុនកើតហេតុបុរសទាំង៥នាក់បន្ទាប់ពីសាងសង់ផ្ទះឱ្យគេភូមិត្រពាំងបន្ទាយរួចមានការនឿយហត់ក៏បាននាំគ្នាសម្រាកនៅកន្លែងធ្វើការដោយមិនបានវិលត្រឡប់ទៅផ្ទះពួកគាត់គាត់វិញទេ។លុះបន្តិចក្រោយមកក៏ស្រាប់តែមានភ្លៀងនិងខ្យល់កន្ត្រាក់យ៉ាងខ្លាំង។
រំពេចនោះក៏មានរន្ទះបានបាញ់ចំបុរសទាំង៥នាក់ដែលកំពុងនៅអង្គុយជុំគ្នាបណ្តាលឱ្យរងរបួស៤នាក់និងស្លាប់ម្នាក់ត្រូវបានអ្នកភូមិជួយបញ្ជូនទៅព្យាបាលនៅមន្ទីរពេទ្យ។ ចំណែកអ្នកស្លាប់សមត្ថកិច្ចបានធ្វើកំណត់ហេតុនិងបានប្រគល់សពឱ្យក្រុមគ្រួសារ៕