កំពង់ស្ពឺ៖ គណៈបញ្ជាការឯកភាពស្រុកបសេដ្ឋ នៅវេលាម៉ោង១និង១០នាទីនាយប់ថ្ងៃទី១៧ ខែមេសា ឆ្នាំ២០២១នេះ បានឃាត់រថយន្ត០២គ្រឿង ធ្វើដំណើរមកពីទិសខាងជើង ទៅទិសខាងត្បូងនៅចំណុចស្ពានអង្គដែកកណ្តាល ស្ថិតនៅភូមិ អង្គដែកកណ្តាល ឃុំពោធិម្រាល ស្រុកបសេដ្ឋ ខេត្តកំពង់ស្ពឺ ដើម្បីសួរនាំ បានប្រទះឃើញព្រះសង្ឃ២អង្គ គួរឲ្យសង្ស័យ។
ប្រភពព័ត៌មានបានឲ្យដឹងថា ក្រោយកើតការសង្ស័យ ភ្លាមៗនោះ កម្លាំងសមត្ថកិច្ចក៏បាននិមន្តមកសួរនាំនៅអធិការនគរបាលស្រុកបសេដ្ឋ ដែលព្រះសង្ឃ២អង្គ មានព្រះនាមដូចខាងក្រោម៖
១-ព្រះតេជគុណ នួន ចិន្តា ព្រះជន្ម ៣៩ ព្រះវស្សា ជាចៅអធិការវត្ត មុន្នីសោភ័ណ្ឌ ស្ថិតនៅ ឃុំពោធិ៍ម្រាល ស្រុកបសេដ្ឋ ខេត្តកំពង់ស្ពឺ។
២-ព្រះតេជគុណ ជឹង ម៉េងហៀក ព្រះជន្ម ៣៥ ព្រះវស្សា ជាចៅអធិការវត្ត សែនឧត្តម ហៅវត្ត (បឹងសាឡាំ) ស្ថិតនៅ ឃុំពោធិ៍ម្រាល ស្រុកបសេដ្ឋ ខេត្តកំពង់ស្ពឺ។
ប្រភពព័ត៌មានបានឱ្យដឹងបន្ថែមទៀតថា គ្រានោះកម្លាំងសមត្ថកិច្ចក៏បានឆែកឃើញវត្ថុតាងដូចខាងក្រោម៖
-ស្រាបៀរចំនួន៥កំប៉ុង,-តេឡេបញ្ជារ ១គ្រាប់,-ចានអាប៉ោង១,-គ្រាប់អាប៉ោងចំនួន៤ គ្រាប់,-ខោអាវចំនួន១០កំប្លេ,-ឯកសណ្ឋាននគរបាលមួយឈុតផងដែរ។
សមត្ថកិច្ចបានបញ្ជាក់ថា ព្រះសង្ឃទាំងពីរអង្គ គឺនិមន្តទៅវត្តព្រះលេខាមេគណខេត្ត ដើម្បីធ្វើតាមវិន័យព្រះពុទ្ធសាសនា និងបន្តទទួលទោសតាមនិតិវិធីច្បាប់រដ្ឋផងដែរ៕
