កំពង់ឆ្នាំង៖កម្លាំងកងរាជអាវុធហត្ថខេត្តបានឃាត់ខ្លួនមេភូមិក្រាំងកន្ទ្រោលសង្ស័យពាក់ព័ន្ធនឹងករណីស្ត្រីម្នាក់ស្លាប់ក្នុងពំនូកភ្លើងនៅស្រុកសាមគ្គីមានជ័យកាលពីថ្ងៃទី២១ខែមិថុនាឆ្នាំ២០២០កន្លងទៅនៅក្នុងខ្ទមចម្ការដែលមានស្នាមឆេះសាកសព។ការឃាត់ខ្លួនជនសង្ស័យនេះគឺបានធ្វើឡើងនៅឃុំពាមស្រុកសាមគ្គីមានជ័យខេត្តកំពង់ឆ្នាំងកាលពីថ្ងៃទី២៧ខែមិថុនាឆ្នាំ២០២០។
លោកអនុសេនីយត្រីប៊ុតធឿននាយការិយាល័យស្រាវជ្រាវបទល្មើសព្រហ្មទណ្ឌនៃបញ្ជាការដ្ឋានកងរាជអាវុធហត្ថខេត្តកំពង់ឆ្នាំងបានឱ្យដឹងថាជនសង្ស័យដែលកម្លាំងឃាត់ខ្លួននេះមានឈ្មោះញេបសុខុមភេទប្រុសអាយ៦៧ឆ្នាំជាមេភូមិក្រាំងកន្ទ្រោល។ដោយឡែកជនរងគ្រោះមានឈ្មោះ ជា ថនភេទស្រី អាយុ៥៦ឆ្នាំ រស់នៅភូមិឃុំកើតហេតុជាមួយគ្នា ។
លោកអនុសេនីយត្រីប៊ុតធឿនបានប្រាប់ឱ្យដឹងទៀតថាតាមការចង្អុលបង្ហាញរបស់លោកឧត្តមសេនីយ៍ត្រីសាក់សារ៉ាងមេបញ្ជាការកងរាជអាវុធហត្ថខេត្តនិងសហការជាមួយស្ថាប័នអយ្យការបានស្រាវជ្រាវតាមនីតិវិធី និងឈានទៅឃាត់ខ្លួនមេភូមិ ញេប សុខុមនេះតែម្តង ។
លោកអនុសេនីយត្រីបានប្រាប់ឱ្យដឹងថាតាមការស្រាវជ្រាវជនសង្ស័យនិងជនរងគ្រោះធ្លាប់ទំនាក់ទំនងស្នេហារជាមួយគ្នាអស់រយៈពេលជា៤ទៅ៥ឆ្នាំមកហើយ។នៅថ្ងៃកើតហេតុក្នុងភូមិមានពិធីភ្ជាប់ពាក្យហើយខាងស្រីបានមកពិធីភ្ជាប់ពាក្យបានផឹកស្រាបៀខ្លះដែរ។ក្រោយពីចប់ពិធីភ្ជាប់ពាក្យជនរងគ្រោះបានជិះម៉ូតូទៅចំណុចស្រែណីមុនរួចបានទូរស័ព្ទមកជនសង្ស័យនិងបានជួបគ្នានៅវេលាម៉ោងប្រមាណជាង១២ថ្ងៃត្រង់។
បន្ទាប់ពីបានជួបគ្នាជនសង្ស័យនិងជនរងគ្រោះបានរួមមេត្រីគ្នារហូតដល់ស្ត្រីរងគ្រោះលែងកំរើកដាច់ខ្យល់ស្លាប់។ក្រោយពីដឹងថាជនរងគ្រោះស្លាប់ជនសង្ស័យភ័យមិនដឹងធ្វើយ៉ាងម៉េចគាត់បានយកសពស្ត្រីរងគ្រោះមកដាក់នៅក្នុងខ្ទមរួចយកអង្កាមក្តារឈើនិងស្លឹកត្នោតគ្របពីលើរួចយកដែកកេះគូសដុតចោលរួចជិះម៉ូតូទៅផ្ទះបាត់តែម្តង។
តាមការស្រាវជ្រាវរបស់សមត្ថកិច្ចកងរាជអាវុធហត្ថខេត្តដឹកនាំកម្លាំងដោយលោកវរសេនីយទោហង្សសុជាតិមេបញ្ជាការរងកងរាជអាវុធហត្ថខេត្ត។លោកអនុសេនីយត្រីប៊ុតធឿននាយការិយាល័យបានឃាត់ខ្លួនជនសង្ស័យនៅថ្ងៃទី២៧ខែមិថុនាតែម្តង។នៅចំពោះមុខសមត្ថជនសង្ស័យបានសារភាពខ្លួនពិតជាបានធ្វើសកម្មភាពទាំងនេះពិតប្រាកដមែន។
បច្ចុប្បន្នជនសង្ស័យត្រូវបានកងរាជអាវុធហត្ថខេត្តកសាងសំណុំរឿងបញ្ជូនទៅតុលាការដើម្បីចាត់ការបន្តទៅតាមនីតិវិធី៕
