ស្ទឹងត្រែង:សមត្ថកិច្ចកងរាជអាវុធហត្ថខេត្តស្ទឹងត្រែងបានចុះអនុវត្តដីការបស់តុលាការខេត្តក្នុងសំណុំរឿងមួយឈានដល់ឃាត់ខ្លួនមនុស្សចំនួន៣នាក់កាលពីព្រឹកថ្ងៃទី៣១ខែធ្នូឆ្នាំ២០២០។
មន្ត្រីសមត្ថកិច្ចបានបញ្ជាក់ថាៈពេលកម្លាំងកងរាជអាវុធហត្ថចុះអនុវត្តដីការបស់តុលាការខេត្តទៅលើស្ត្រីម្នាក់ក្នុងសំណុំរឿងមួយនោះក៏ស្រាប់តែមានកូនប្រុសចំនួន២នាក់របស់គាត់មករារាំងសមត្ថកិច្ចក្នុងការអនុវត្តដីកាទើបឈានដល់ការឃាត់ខ្លួនមនុស្សដល់ទៅ៣នាក់។
យោងតាមដីកាបង្គាប់ឱ្យនាំខ្លួនរបស់លោកសាយស្រីល័ក្ខណចៅក្រមស៊ើបសួរសាលាដំបូងខេត្តស្ទឹងត្រែងទៅលើស្ត្រីឈ្មោះក្រឹមអៃសះអាយុ៤៧ឆ្នាំជាកសិករមានទីកន្លែងកំណើតភូមិឈើទាលភ្លោះឃុំព្រែកសាម៉ាន់ស្រុកឆ្លូងខេត្តក្រចេះ។បច្ចុប្បន្នមានទីលំនៅភូមិឃុំអូរឫស្សីកណ្ដាលស្រុកសៀមបូកខេត្តស្ទឹងត្រែង។
ជននេះត្រូវបានដាក់ឱ្យស្ថិតក្រោមការពិនិត្យពីបទធ្វើឱ្យខូចខាតដោយចេតនាមានស្ថានទម្ងន់ទោសនិងធ្វើឱ្យបាត់ជំនឿលើសេចក្តីសម្រេចរបស់តុលាការប្រព្រឹត្តនៅភូមិអូរឫស្សីកណ្ដាលឃុំអូរឫស្សីកណ្ដាលស្រុកសៀមបូកខេត្តស្ទឹងត្រែងកាលពីថ្ងៃទី១៨ខែធ្នូឆ្នាំ២០១៩។ជនត្រូវចោទរូបនេះពុំបានចូលមកបង្ហាញខ្លួនតាមដីកាបង្គាប់ឱ្យចូលខ្លួនរបស់តុលាការទេ។
ពេលសមត្ថកិច្ចចុះអនុវត្តដីកាស្រាប់តែមានកូនប្រុសចំនួន២នាក់មករារាំងសមត្ថកិច្ចទើបមានការឃាត់ខ្លួន។ទី១ឈ្មោះហៀតអាមីនភេទប្រុសអាយុ៣៦ឆ្នាំកាន់ប័ណ្ណសារព័ត៌មានអង្គភាពរក្សាសន្តិភាព។ទី២ឈ្មោះហៀតណាអ៊ីនភេទអាយុ៣២ឆ្នាំ។នៅចំពោះមុខសមត្ថកិច្ចជនពីរនាក់ពិនិត្យទឹកនោមឃើញថាមានសារធាតុញៀន។ដោយឡែកស្ត្រីជាម្ដាយដែលជាជនត្រូវចោទបានប្រាប់អ្នកសារព័ត៌មានថាសំណុំរឿងខាងលើនេះទាក់ទងនឹងវិវាទដីធ្លី៕សហការី