ភ្នំពេញ៖បុរសជនជាតិចិនតៃវ៉ាន់ម្នាក់ ត្រូវបានគេប្រទះឃើញស្លាប់ រហូតហើមស្អុយក្នុងបន្ទប់ខុនដូ ស្កាយទ្រី ជាន់ទី១១ សមត្ថកិច្ចកំពុងស៊ើបអង្កេត។ខុនដូស្កាយទ្រីស្ថិតនៅផ្លូវលេខ១០៥ ក្នុងសង្កាត់ទួលសង្កែទី១ ខណ្ឌឬស្សីកែវ កាលពីល្ងាចថ្ងៃទី១១ ខែមករា។
មន្ត្រីចុះពិនិត្យសពបានឱ្យដឹងថា ហេតុការណ៍នេះត្រូវបានសន្តិសុខប្រចាំខុនដូ បានរាយការណ៍ប្រាប់សមត្ថកិច្ច ដើម្បីចុះទៅត្រួតពិនិត្យ។ ជនបរទេស ដែលដេកស្លាប់គេស្គាល់អត្តសញ្ញាណ ឈ្មោះ CHUANG YI ZE ភេទប្រុស អាយុ៤១ឆ្នាំជនជាតិចិនតែវ៉ាន់ ស្នាក់នៅបន្ទប់លេខ ១១ F០៩ ជាន់ទី១១ ខុនដូ ស្កាយទ្រី ខាងលើ។
ប្រភពពីមន្ត្រីដដែលបានបន្តថា សពបុរសជនជាតិចិន បានស្លាប់ឡើងហើមស្អុយ ទៅហើយ ទើបបង្កឱ្យមានការភ្ញាក់ផ្អើលដល់បុគ្គលិក និងសន្តិសុខ។ប៉ុន្តែទោះបីជាយ៉ាងណា គេមិនទាន់ដឹងថា ជនជាតិចិនរូបនោះ ស្លាប់តាំងពីពេលនោះទេ។ បន្ទាប់ពីប្រទះឃើញសព នគរបាលជំនាញនិងគ្រូពេទ្យ រួមជាមួយនគរបាលមូលដ្ឋាន ក៏បានចុះទៅត្រួតពិនិត្យ និងស្រាវជ្រាវរកមូលហេតុនៃការស្លាប់នេះ៕
