ភ្នំពេញ៖សមត្ថកិច្ចខណ្ឌទួលគោក ចុះរឹតបន្តឹងច្បាប់ចរាចរណ៍ ដោយបានឃាត់ខ្លួនជនសង្ស័យ២នាក់ ហើយបានរកឃើញគ្រាប់កាំភ្លើងខ្លី ដាក់តាមខ្លួនចំនួន៦គ្រាប់។ករណីនេះបានកើតឡើងនៅផ្លូវលេខ៥៩៨ ស្ថិតក្នុងសង្កាត់ទឹកល្អក់ទី១ ខណ្ឌទួលគោក កាលពីយប់ថ្ងៃទី៥ ខែធ្នូ។
កម្លាំងគោលដៅបានឱ្យដឹងថា មុនឃាត់ខ្លួនជនសង្ស័យទាំង២នាក់ សមត្ថកិច្ចខណ្ឌបានចុះរឹតបន្តឹងច្បាប់ចរាចរណ៍ ក៏ឃាត់ម៉ូតូមួយគ្រឿងមានបុរស២នាក់ជិះឌុបគ្នា។ជាមួយនោះសមត្ថកិច្ចសង្ស័យ ក៏បានឆែកឆេររកឃើញ គ្រាប់កាំភ្លើងខ្លីម៉ាករ៉ូឡូ៦គ្រាប់ដាក់ជាប់ខ្លួន។
ក្រោយពីឃាត់ខ្លួននិងសាកសួរ ជនសង្ស័យបានសារភាពថា គ្រាប់កាំភ្លើងទាំងនេះពួកគេរើសបាន។បន្ទាប់មកបុរសទាំង២នាក់ ត្រូវបានកម្លាំងសមត្ថកិច្ចនាំទៅអធិការដ្ឋាននគរបាលខណ្ឌទួលគោកដើម្បីបន្តនីតិវិធី៕
