(សៀមរាប)៖ បន្ទាប់ពីបានបើកទទួលជើងហោះហើរ នៅអាកាសយានដ្ឋានអន្តរជាតិ សៀមរាប-អង្គរ នាពេលថ្មីៗនេះ គេសង្កេតឃើញថា មានបងប្អូនប្រជាពលរដ្ឋជាច្រើន បាននាំគ្នាសម្រុកទៅទស្សនា និងផ្ដិតយករូបភាពសមិទ្ធិផលថ្មី ជាប្រវិត្ដសាស្ដ្ររបស់ប្រទេសកម្ពុជា។
ថ្លែងប្រាប់បណ្ដាញព័ត៌មានបណ្ដាញ Fresh News នៅថ្ងៃទី២៣ ខែតុលា ឆ្នាំ២០២៣នេះ លោក លី វណ្ណៈ នាយករដ្ឋបាលខេត្ដសៀមរាប បានថ្លែងថា ក្នុងនាមអាជ្ញាធរខេត្ដមានការសប្បាយចិត្ដ ដែលឃើញប្រជាពលរដ្ឋមកទស្សនាច្រើនបែបនេះ។
លោក លី វណ្ណៈ បានគូសបញ្ជាក់ថា អាកាសយានដ្ឋានអន្តរជាតិសៀមរាប-អង្គរ គឺជាសមិទ្ធិផលប្រវត្ដិសាស្ដ្រថ្មី និងជាព្រលានយន្ដហោះ ដែលធំជាងគេបំផុតនៅក្នុងប្រទេសកម្ពុជាបច្ចុប្បន្ន បានបង្ហាញដល់ប្រជាពលរដ្ឋឃើញពីការអភិវឌ្ឍន៍របស់រាជរដ្ឋាភិបាល ក្រោមការដឹកនាំរបស់សម្ដេចតេជោ ហ៊ុន សែន ក៏ដូចជាសម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា។
លោកបានបញ្ជាក់ថា អាជ្ញាធរខេត្ដបានសហការជាមួយគណៈគ្រប់គ្រងព្រលានយន្ដហោះ ដើម្បីឲ្យប្រជាពលរដ្ឋចូលទៅទស្សនា និងមានសមត្ថកិច្ច ដើម្បីសម្រួលចរាចរណ៍ និងរក្សាសុខសុវត្ថិភាពផងដែរ។
ទន្ទឹមគ្នានេះ លោកក៏សូមអំពាវនាវដល់ប្រជាពលរដ្ឋ ឲ្យគោរពទៅតាមការណែនាំ របស់អាជ្ញាធរក៏ដូចជាផ្នែកសន្ដិសុខនៃព្រលានយន្ដហោះ និងសូមកុំឲ្យរំខាតដល់ភ្ញៀវទេសចរធ្វើដំណើរ និងរួមគ្នាថែរក្សាអនាម័យ សណ្តាប់ធ្នាប់ឱ្យបានល្អ។
សូមជម្រាបថា អាកាសយានដ្ឋានអន្តរជាតិ សៀមរាប-អង្គរ បានទទួលជើងហោះហើរ ពាណិជ្ជកម្មដំបូង កាលពីព្រឹកថ្ងៃទី១៦ ខែតុលា ឆ្នាំ២០២៣។ អាកាសយានដ្ឋាននេះ គ្រោងនឹងសម្ពោធជាផ្លូវការ នៅថ្ងៃទី១៦ ខែវិច្ឆិកា ឆ្នាំ២០២៣ ក្រោមអធិបតីភាព សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជាមួយនឹងថ្នាក់ដឹកនាំចិន។
អាកាសយានដ្ឋានអន្តរជាតិ សៀមរាប-អង្គរ មានទីតាំងស្ថិតនៅភូមិក្រៀលពង ឃុំពពេល និងភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប ចម្ងាយពីប្រាសាទអង្គរវត្ត ៤០គីទ្បូម៉ែត្រនិង ៥១គីទ្បូម៉ែត្រពីក្រុងសៀមរាប៕
