ភ្នំពេញ៖រថយន្តទំនើបបើកបុកម៉ូតូចំពីក្រោយ បណ្តាលឱ្យបុរស២នាក់រងរបួសធ្ងន់ធ្ងរ ហើយរថយន្តព្យាយាមបើករត់ជ្រុលធ្លាក់ជង្ហុកទៅមុខលែងរួច រីឯតៃកុងចុះរត់គេចខ្លួនបាត់។គ្រោះថ្នាក់ចរាចរណ៍នេះបានកើតឡើងនៅសង្កាត់កាកាបទី២ ខណ្ឌពោធិ៍សែនជ័យ កាលពីរំលងអធ្រាត្រចូលថ្ងៃទី១២ ខែកញ្ញា។
អ្នកឃើញហេតុការណ៍បានឱ្យដឹងថា ដំបូងជនរងគ្រោះបានបើកម៉ូតូម៉ាកហុងដាឌ្រីមផ្លាកលេខ ស្វាយរៀង1A-9183 ឌុបគ្នា២នាក់ពីកើតទៅលិច។មកដល់កន្លែងខាងលើស្រាប់តែមានរថយន្តទំនើបផ្លាកលេខភ្នំពេញ 2BF-5495 បើកមកពីក្រោយយ៉ាងលឿន បានបុកពេញទំហឹង បណ្តាលឱ្យបុរស២នាក់រងរបួសធ្ងន់។
ពេលបង្កគ្រោះថ្នាក់រថយន្តមិនបានឈប់ទេ ក៏ព្យាមយាមបើករត់ចូលតាមផ្លូវលំមួយខ្សែ បណ្តាលឱ្យជ្រុលធ្លាក់ជង្ហុកទៅមុខលែងរួច។ភ្លាមនោះអ្នកបើកបរបានបើកទ្វារចុះគេចខ្លួនបាត់ទុករថយន្តចោលនៅទីនោះ។ចំណែកខាងម៉ូតូរងគ្រោះទាំង២នាក់ត្រូវបានគេជួយដឹកទៅមន្ទីរពេទ្យ។
បន្ទាប់ពីកើតហេតុសមត្ថកិច្ចចរាចរណ៍បានចុះពិនិត្យវាស់វែង ហើយយករថយន្តបង្កនិងម៉ូតូទៅទុកនៅអធិការដ្ឋាននគរបាលខណ្ឌពោធិ៍សែនជ័យ រង់ចាំតំណាងភាគីទាំងសងខាងមកដោះស្រាយពេលក្រោយ៕
