កំពង់ស្ពឺ៖ លោក ហ៊ុយ សេង ជាមន្ត្រីស្មៀនឃុំព្រះស្រែ ស្រុកឧដុង្គ ខេត្តកំពង់ស្ពឺ ត្រូវបានកម្លាំងសមត្ថកិច្ចបានបញ្ជូន មកកាន់សាលាដំបូង ខេត្តកំពង់ស្ពឺ កាលពីព្រឹកថ្ងៃទី២៩ ខែកញ្ញា ឆ្នាំ២០២០ តាមពាក្យបណ្តឹងរបស់ ប្រជាពលរដ្ឋ ក្នុងឃុំព្រះស្រែទាំងមូល ពីបទបរិហាកេរ្តិ៍ ជាសាធារណៈ ។បើទោះបី លោក ស្មៀនឃុំរូបនេះ បានបោះពាក្យសម្ដីថា រូបគេ មានលុយចាយ មិនអស់ក៏ដោយ ។
លោក អ៊ូ ផាត ព្រះរាជអាជ្ញារង អមសាលាដំបូង ខេត្តកំពង់ស្ពឺ បានសម្រេចចោទប្រកាន់ លើជនត្រូវចោទ ឈ្មោះ ហ៊ុយ សេង ជាមន្ត្រីស្មៀនឃុំព្រះស្រែ នៃស្រុកឧដុង្គ ខេត្តកំពង់ស្ពឺ ពីបទ បរិហារ បង្កាច់កេរ្ដិ៍ យោងតាមមាត្រា ៣១១ និងមាត្រា ៣១២ នៃក្រមព្រហ្មទណ្ឌ និងបានបញ្ជូនសំណុំរឿង ទៅឱ្យចៅក្រមស៊ើបសួរ ដើម្បីចាត់ការបន្ត តាមនីតិវិធីហើយ។
សូមជម្រាបថា ជនត្រូវចោទ ឈ្មោះ ហ៊ុយ សេង ដែលធ្លាប់ប្រកាសប្រាប់ពលរដ្ឋក្នុងស្រុក ភូមិថា ខ្លួនជាអ្នកមានលុយ រាប់មិនអស់ ត្រូវបានពលរដ្ឋ ប្ដឹងទៅអយ្យការ អមសាលាដំបូង ខេត្តកំពង់ស្ពឺ ពីបទ បរិហារ បង្កាច់កេរ្តិ៍ កាលពីថ្ងៃទី២២ ខែកក្កដា ឆ្នាំ២០២០ កន្លងទៅ។ ស្មៀនឃុំព្រះស្រែ ដែលសម្បូររឿងអាស្រូវ រូបនេះ ក៏ធ្លាប់ត្រូវពលរដ្ឋប្ដឹង ទៅកាន់សម្ដេចតេជោ នាយករដ្ឋមន្ត្រី ហ៊ុន សែន ផងដែរ កាលពីអំឡុងឆ្នាំ២០១៧ កន្លងទៅ ពាក់ព័ន្ធករណី ធ្វើរបងបេតុង និងចាក់ដី រំលោភយកដីអូរសាធារណៈ។
ប៉ុន្ដែរហូតមកដល់ពេលនេះ ពុំទាន់ឃើញមាន អាជ្ញាធរជំនាញ ថ្នាក់លើណា ហ៊ានចេញមុខមកដោះស្រាយ ឬឱ្យមន្ត្រីស្មៀន ដែលមានលុយ រាប់មិនអស់រូបនេះ វាយរបងបេតុងនោះ ចេញនៅឡើយទេ។ គឺបានត្រឹមតែចុះពិនិត្យ និងធ្វើកំណត់ហេតុ ជូនថ្នាក់លើថា ពិតជាមានការរំលោភ យកដីអូរប្រាកដមែន។ ជាមួយគ្នានោះ ក៏ពុំមានឃើញមន្ត្រីថ្នាក់លើណា ហ៊ានប៉ះពាល់ ឬដាក់ពិន័យរដ្ឋបាល ចំពោះស្មៀនរូបនេះឡើយ ៕
