ខេត្តកំពង់ស្ពឺ ៖ តាមការរាយការណ៍ពីសមត្ថកិច្ចថា កាលពីអំឡុងចុងខែវិច្ឆិកា ឆ្នាំ២០២២ កន្លងទៅ មាននគរបាលប្រឆាំងបទល្មើសសេដ្ឋកិច្ចខេត្តកំពង់ស្ពឺមួយក្រុមមានគ្នា៣ទៅ៤នាក់បានជិះរថយន្តស៊េរីទំនើបៗបានទៅដល់ការ ដ្ឋានជីកកាយ និងបូមខ្សាច់សង្ស័យអត់ច្បាប់មួយកន្លែងស្ថិតនៅម្តុំដីព្រៃសហគមន៍ ឧត្តមស្រែពស់ (ចំណុចខ្សាច់ស) ស្ថិតក្នុងភូមិពោធិមាស ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ។ប្រភពរាយការណ៍ថា ពេលក្រុមនគរបាលប្រឆាំងបទល្មើសសេដ្ឋកិច្ចខេត្តកំពង់ស្ពឺ ចុះទៅដល់ទីតាំងការដ្ឋានខាងលើនេះ បាននិយាយជាមួយម្ចាស់ការដ្ឋាននោះ សង្ស័យជំរិតទារលុយជិត២០០០ដុល្លារអាមេរិក ជាថ្នូរនិងការមិនរាយការណ៍និងចាប់បង្ក្រាប ដោយសង្ស័យទីតាំងជីកកាយបូមខ្សាច់ខាងលើនេះ គ្មានច្បាប់អនុញ្ញាត ហើយលួចជីកកាយបូមលាក់ពីជំនាញ និងអាជ្ញាធរពាក់
ព័ន្ធ ។ក្រោយពីមានការចរចាគ្នាពីសំណាក់ ម្ចាស់ទីតាំងនិងក្រុមនគរបាលប្រឆាំងបទល្មើសសេដ្ឋកិច្ចខេត្តកំពង់ស្ពឺ ដែលគេបង្ហើបថា មានឈ្មោះ ភាស់, ឈ្មោះធី, ឈ្មោះ ម៉ៅ និងឈ្មោះគុណ គឺក្រុមនគរបាលទាំងនោះ ព្រមយកលុយចំនួនលុយ១០៥០ដុល្លារសហរដ្ឋអាមេរិកវិញ ។ មិនតែប៉ុណ្ណោះ ការលួចជីកកាយបូមខ្សាច់របស់ម្ចាស់ការដ្ឋានសង្ស័យអត់ច្បាប់ទម្លាប់នេះ បានចំណាយលុយជាច្រើនទៅស្ថាប័ន ពាក់ព័ន្ធនានាលើកលែងតែគ្រូពេទ្យគ្រូបង្រៀន និងអាចារ្យវត្តតែប៉ុណ្ណោះ ទើបមិនបង់លុយឱ្យ ។ សង្ស័យការជំរិតទារលុយម្ចាស់ការដ្ឋានជីកកាយបូមខ្សាច់ពីសំណាក់ក្រុមនគរបាលប្រឆាំងបទល្មើសសេដ្ឋកិច្ចនេះ វាផ្ទុយពីជំនាញរបស់ខ្លួន ដោយសារតែការជីកកាយបូមខ្សាច់ គឺពាក់ព័ន្ធជាមួយជំនាញរ៉ែនិងថាមពលតែប៉ុណ្ណោះ ។ ប្រភពព័ត៌មានបានបន្ថែមទៀតថា ការដ្ឋានជីកកាយ បូមខ្សាច់មួយកន្លែងស្ថិតនៅក្នុងភូមិពោធិមាស ឬហៅថា ( ភូមិស្រែច្រាប ) ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ បច្ចុប្បន្ននេះបានផ្អាកសកម្មភាពហើយ ដោយបែកធ្លាយរឿងលួចជីកកាយមិនសុំច្បាប់ទៅជំនាញរ៉ែនិងថាមពល។តាមការបង្ហើបពីសមត្ថកិច្ចស្រុកឱរ៉ាល់ថា ម្ចាស់ការដ្ឋានជីកកាយ និងបូមខ្សាច់សង្ស័យអត់ច្បាប់នេះ មានឈ្មោះ ថៅកែហាប់ (ជាម្ចាស់ហាងភោជនីយដ្ឋានមួយកន្លែងខាងត្បូងរង្វង់មូលស្ពានដែក) ក្នុងភូមិច្រកទៀក ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ។
ការដ្ឋាននេះ ត្រូវបានប្រជាពលរដ្ឋដាក់ការសង្ស័យថា ក្រុមឈ្មួញធ្វើអាជីវកម្មគ្មានច្បាប់បណ្តាលឱ្យបាត់បង់ចំណូលពន្ធរដ្ឋដោយចោទប្រកាន់ថា មានការឃុបឃិតគ្នាជាប្រព័ន្ធតាមរយៈធ្វើមិនដឹងមិនឮរបស់អាជ្ញាធរស្រុកឱរ៉ាល់ និងមន្ត្រីជំនាញការិយាល័យរ៉ែ និងថាមពលស្រុកឱរ៉ាល់ ។ ការសង្ស័យរបស់ប្រជាពលរដ្ឋទៅលើអាជ្ញាធរស្រុកឱរ៉ាល់ លោកអភិបាលស្រុកវ័យក្មេងរូបនេះ និងការិយាល័យរ៉ែ និងថាមពលស្រុកឱរ៉ាល់នេះ ក្រោយពីមានមន្ត្រីជំនាញរ៉ែនិងថាមពលខេត្តកំពង់ស្ពឺដឹកនាំមន្ត្រីក្រោមឱវាទ សមត្ថកិច្ច និងអាជ្ញាធរភូមិចុះទៅពិនិត្យនិងធ្វើកំណត់ហេតុ ដល់ទីតាំងការដ្ឋានលួចជីកកាយបូមខ្សាច់នោះ ។
ក្រោយពីពិនិត្យរួចរាល់ មន្ត្រីជំនាញរ៉ែនិងថាមពលខេត្តកំពង់ស្ពឺនោះ មិនបានឃាត់គ្រឿងចក្រនៅក្នុងការដ្ឋានជីកកាយបូមខ្សាច់នោះទេ ហាក់បីដូចជាបណ្តោយឱ្យឈ្មួញលួចដកគ្រឿងចក្រ ទាំងដឹងថា មិនមានច្បាប់ថែមទៀតផង។ កត្តានេះហើយ ធ្វើឱ្យប្រជាពលរដ្ឋ រស់នៅក្នុងភូមិពោធិមាស ឃុំត្រពាំងជោ ស្រុកឱរ៉ាល់ ជាពិសេសប្រជាសហគមន៍ ឧត្តមស្រែពស់ រឹតតែដាក់ការសង្ស័យទៅលើសមត្ថកិច្ចចម្រុះ មន្ត្រីរ៉ែនិងថាមពលស្រុក និងខេត្តកំពង់ស្ពឺ សង្ស័យឃុបឃិតគ្នាជាប្រព័ន្ធខ្លាំងថែមទៀតផង។
យោងតាមប្រភពពីមន្ត្រីក្នុងស្រុកឱរ៉ាល់បានឲ្យដឹងថា ទីតាំងការដ្ឋានខ្សាច់ខាងលើ បានធ្វើសកម្មភាពជីកកាយ បូមយកខ្សាច់ជិតមួយខែមកហើយ មានទំហំជិត១ហិកតាទៅហើយ ដោយម្ចាស់ទីតាំងមួយនេះបានតំឡើងម៉ាស៊ីនបូមខ្នាតធំៗ និងមានគ្រឿងចក្រមួយចំនួនធ្វើការជីកកាយ និងបូមជារៀងរាល់ថ្ងៃ ៕
