រថយន្ដព្រួសបុកខឿនផ្លូវ ឆ្លងចរន្តភ្លើងឆាប់ឆេះអស់ទាំងស្រុង

ភ្នំពេញ៖រថយន្តម៉ាក Toyota Prius មួយគ្រឿងពេលកំពុងបើកបរក៏បុកខឿនផ្លូវស្រាប់តែឆ្លងចរន្តភ្លើងបានឆាបឆេះអស់គ្មានសល់តែមិនបង្កគ្រោះថ្នាក់ដល់មនុស្សទេ។
សមត្ថកិច្ចបានឱ្យដឹងថា ករណីអគ្គិភ័យឆាបឆេះរថយន្តនេះស្ថិតនៅត្រង់ស្ពានស្ទឹងមានជ័យ តាមផ្លូវព្រះមុនីរ៉េត ក្នុងសង្កាត់ស្ទឹងមានជ័យទី១ ខណ្ឌមានជ័យ កាលពីម៉ោងជាង១២រំលងអធ្រាត្រចូលថ្ងៃទី៩ ខែមេសាឆ្នាំ២០២២។
មុនកើតហេតុបុរសម្នាក់បើករថយន្តម៉ាកToyota Prius ផ្លាកលេខភ្នំពេញ 2BJ-0755 តាម ផ្លូវព្រះមុនីរ៉េតពីកើតទៅលិចក្រោមស្ពានអាកាសស្ទឹងមានជ័យ។រថយន្តនេះបានជ្រុលទៅបុកខឿនផ្លូវពេញទំហឹងបណ្ដាលឱ្យរថយន្តបែកកង់និងផ្ទុះពោង។
បន្ទាប់មកមានផ្សែងហុយចេញពីផ្នែកខាងមុខរថយន្តភ្លើងក៏ឆាបឆេះរាលដាលកាន់តែខ្លាំងឡើងៗឆេះរថយន្តអស់ស្ទើរទាំងស្រុងទើបមានរថយន្តទឹក១គ្រឿងរបស់សមត្ថកិច្ចមកដល់និងបាញ់ពន្លត់ភ្លើងឱ្យរលត់៕