ភ្នំពេញ៖ស្ត្រីវ័យក្មេង២នាក់ជិះម៉ូតូឌុបគ្នាត្រូវក្រុមចោរ២នាក់ជិះម៉ូតូ២គ្រឿងបានឆក់ទូរសព្ទពីនាងអង្គុយខាងក្រោយបានសម្រេចតែអ្នកដំណើរដេញយកបានមកវិញ។
ហេតុការណ៍នេះបានកើតឡើងនៅលើស្ពានអាកាសស្ទឹងមានជ័យក្នុង ខណ្ឌមានជ័យ កាលពីរំលងអាធ្រាត្រចូលថ្ងៃទី៩ខែធ្នូ ឆ្នាំ២០២១។
សាក្សីបានឱ្យដឹងថា ដំបូងមានស្ត្រីវ័យក្មេង២នាក់ជិះម៉ូតូម៉ាកស្គូបពីឌុបគ្នាឡើងស្ពានអាកាសស្ទឹងមានជ័យ។មកដល់ពាក់កណ្តាលស្ពានស្រាប់តែមានចោរ២នាក់ជិះម៉ូតូ២គ្រឿងបានឆក់យកទូរសព្ទពីនាងដែលអង្គុយខាងក្រោយបានសម្រេច រួចបានព្យាយាមជិះម៉ូតូគេចខ្លួន។
ភ្លាមនោះមានបុរសបើកផាស្អេបតាមក្រោយឃើញសកម្មភាពនេះក៏បើកផាស្អេបបំបុកបណ្តាលឱ្យម៉ូតូជនសង្ស័យដួល។ជនសង្ស័យបានព្យាយាមឡើងម៉ូតូបក្ខពួករត់គេចខ្លួនដោយទុកម៉ូតូមួយគ្រឿងនិងដំបងឆក់មួយដើមនៅកន្លែងដួល។ជាមួយនោះក៏មានយុវជនម្នាក់ទៀតជិះម៉ូតូដេញតាមក្រោយ។ជនសង្ស័យក៏បានគប់ទូរសព្ទឱ្យយុវជននោះហើយបន្តរត់ចូលកន្លែងស្ងាត់បាត់ទៅ៕
