កណ្ដាល៖នគរបាលស្រុកកណ្ដាលស្ទឹងបានចាប់ជនសង្ស័យ២នាក់ករណីលួចម៉ូតូតែមិនបានសម្រេចនៅភូមិរុន ឃុំរកា ស្រុកកណ្ដាលស្ទឹង ខេត្តកណ្ដាល កាលពីថ្ងៃទី៦ ខែសីហា។
សមត្ថកិច្ចបានឱ្យដឹងថា ជនរងគ្រោះឈ្មោះ អ៊ុន សុខចាន់ ភេទប្រុស មានទីលំនៅ ស្រុកកណ្តាលស្ទឹង ខេត្តកណ្ដាល ។ជនសង្ស័យ២នាក់ ទីឈ្មោះ ឃត ពេជ្រ អាយុ២៦ឆ្នាំ និងឈ្មោះ ម៉ន ម៉េងហ៊ួ ភេទប្រុស អាយុ១៧ឆ្នាំ បច្ចុប្បន្នទាំង២នាក់ស្នាក់នៅផ្ទះជួលភូមិខ្ចៅ សង្កាត់បឹងធំ ខណ្ឌកំបូល ។ ចំណែកវត្ថុតាងចាប់៖ម៉ូតូ២គ្រឿងម៉ាកហុងដារបស់ជនរងគ្រោះនិងមួយគ្រឿងទៀតម៉ាកហុងរបស់ជនល្មើស ។
ជនសង្ស័យ២នាក់បានធ្វើសកម្មភាពលួចយកម៉ូតូរបស់ជនរងគ្រោះជិះគេចខ្លួនតាមផ្លូវលេខ៣៤មកទិសខាងកើត ឃើញដូចនោះប្រជាពលរដ្ឋបានដេញតាមពីក្រោយ ។ភ្លាមនោះ នគរបាលប៉ុស្តិ៍រដ្ឋបាលឃុំរការ ពួនស្ទាក់តែជនសង្ស័យឃើញកម្លាំងក៏បានផ្តួលម៉ូតូរត់គេចខ្លួនហែលទឹកឆ្លងស្ទឹងព្រែកត្នោត តែត្រូវចាប់ខ្លួនបញ្ជូនមកកាន់អធិការដ្ឋាននគរបាលស្រុកកណ្តាលស្ទឹងដើម្បីកសាងសំណុំរឿងតាមនីតិវិធី៕
